იუპიტერის ხვეული ღრუბლები, რომელიც ნასას იუნონას (Juno) ზონდმა გადაიღო, სიზმარში ნანახ საოცრებას, ან სულაც, ვან გოგის ცნობილ ნახატს ჰგავს.

სამოქალაქო მეცნიერმა ამელია კაროლინა სპარავინამ მსგავსება დაინახა ნამდვილ კოსმოსურ ფოტოსა და იმ ხვეულებს შორის, რომლებიც ვინსენტ ვან გოგმა გამოიყენა ღამის ცის ელემენტებისთვის. ამელიამ ნახატის ეს სექცია შეცვალა და შედეგად მიღებული სურათი გვიჩვენებს მსგავსებას ხელოვნებასა და ბუნებას შორის (სპარავინა არ არის ერთადერთი JunoCam მომხმარებელი, რომელმაც მსგავსებები შენიშნა).

ფოტო: ამელია კაროლინა სპარავინა/ნასა

ნასას იუნონას მისიის მთავარი მიზანი არის იუპიტერის იმ რეგიონების შესწავლა, რომლებიც პლანეტის ღრუბლიანი "ზედაპირის" ქვეშ იმალება. სპარავინას მიერ გამოყენებული სურათი ზონდმა იუპიტერთან ყველაზე ახლოს ჩაფრენისას გადაიღო 2 თებერვალს (სურათის აღწერის მიხედვით). იუნონას ზონდი ამჟამად იუპიტერის გარშემო მოძრაობს და პლანეტასთან ყოველ 53 დღეში ერთხელ მიდის. ეს ორბიტა ზონდს ექსტრემალური რადიაციული სარტყლისგან იცავს, რომელიც იუპიტერს აკრავს გარშემო.

იუპიტერზე არსებული მორევისებრი ღრუბლები, რომელიც გადაღებულია JunoCam-ით და დამუშავებულია სამოქალაქო მეცნიერ რომან ტკაჩენკოს მიერ

ფოტო: რომან ტკაჩენკო/ნასა

ნედლი სურათები, რომელთაც JunoCam აგზავნის დედამიწაზე, შეიცავს ინფორმაციას, რომლის ამოღებაც სურათის დამუშავებისა და ფერთა კორექციის შემდეგ შეიძლება. საბოლოო სურათი ისეთია, როგორიც იქნებოდა ესა თუ ის ობიექტი ადამიანის თვალით. ზონდის მიერ გადმოგზავნილი სურათების უმეტესობა მოხალისე მეცნიერების დამუშავებულია. JunoCam-ის გუნდი პოსტავს ნედლი სურათის ფაილებს ონლაინ და ნებისმიერ მსურველს შეუძლია, დამუშავების შემდეგ საბოლოო შედეგი JunoCam-ის ვებგვერდზე დაპოსტოს. მოხალისეებს საკუთარი მიდგომა აქვთ: ზოგიერთი მათგანი ხელოვნების ნიმუშს ქმნის, სხვები კი სიზუსტესა და ინფორმაციულობაზე არიან ორიენტირებულნი.