ჯანდაცვის მინისტრის მოადგილის, თამარ გაბუნიას განცხადებით, ეპიდსიტუაციის მხრივ ქვეყანამ პიკი გარკვეულწილად გადაიარა და ახლა დაღმასვლის ეტაპი დაიწყება.

"დღევანდელი მაჩვენებელი დაახლოებით 2000-მდე იყო, რაც ვიცით, რომ არ არის სრული ასახვა, რადგან შაბათ-კვირის შემდეგ არის, თუმცა ეს არის დაახლოებით 1000 ერთეულით ნაკლები იმაზე ნაკლები, რაც წინა პერიოდის იგივე დღეებში გვქონდა. არის გარკვეული სტაბილიზაციის ნიშნები, ანუ ჩვენ პიკი გარკვეულწილად გადავიარეთ და ახლა დაიწყება დაღმასვლის ეტაპი, მაგრამ აქ მთავარია ის, თუ რამდენად სწრაფად მოხდება დაღმასვლა, ამდენად პრევენციული ღონისძიებები, რომელიც აქამდე გვქონდა გატარებული, ახლა არანაკლებ კიდევ მნიშვნელოვანია იმიტომ, რომ არ მოხდეს კვლავაც ესკალაცია", — თქვა მან.

გაბუნიას თქმით, მოლოდინია, რომ ოქტომბრის დასაწყისი მშვიდი უნდა იყოს, თუმცა მანამდე ქვეყანას საკმაოდ სერიოზული პერიოდის გავლა მოუწევს.

"რაც შეეხება გარდაცვალების შემთხვევებს, იცით, რომ გარდაცვალების შემთხვევების კლებას სჭირდება გარკვეული პერიოდი, დაახლოებით ორი კვირაა ის პერიოდი, როდესაც შემთხვევების სტაბილიზაციას შემდეგ უკვე მოჰყვება გარდაცვალების სტაბილიზაცია. ჩვენი მოლოდინიც იმგვარია, რომ ოქტომბრის დასაწყისი მშვიდი უნდა იყოს, თუმცა მანამდე მოგვიწევს საკმაოდ სერიოზული პერიოდის გავლა", — განაცხადა მინისტრის მოადგილემ.

30 აგვისტოს მონაცემებით, საქართველოში კორონავირუსის 1 915 ახალი შემთხვევა დადასტურდა, გამოჯანმრთელდა 5 929, ხოლო გარდაიცვალა — 78 ადამიანი.

ბოლო 24 საათში ჩატარდა 21 411 კვლევა ტესტით, მათ შორის 12 305 კვლევა ანტიგენის ტესტით და 9 106 PCR ტესტით.

30 აგვისტოს მდგომარეობით, დადებითობის დღიურიმაჩვენებელი არის — 8,94%, ბოლო 14 დღის მანძილზე — 10,44% ხოლო 7 დღის მანძილზე — 10,04%.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: