პანდემიის დასამარცხებლად დღეს მსოფლიოს მთავარი იარაღი ვაქცინაციაა. ვაქცინაცია ჩვენი, ჩვენი ოჯახის წევრებისა და საყვარელი ადამიანების დასაცავად, აგრეთვე, ცხოვრების ჩვეულებრივ რიტმში დასაბრუნებლად აუცილებელია. ამ მოსაზრებას იზიარებს ჩხოროწყუს რამინ დიხამინჯიას სახელობის N1 საჯარო სკოლაც, რომლის ფეისბუქ გვერდზე სკოლის დირექტორმა ვაქცინაციის აუცილებლობის შესახებ კიდევ ერთხელ შეგვახსენა.

"სექტემბრამდე, სანამ სკოლაში შევხვდებით ერთმანეთს, მინდა ერთი კარგი ამბავი გითხრათ: სასწავლო წლის დასრულებისას ჩვენ, პედაგოგები შევთანხმდით, გამოგვეყენებინა საზაფხულო შვებულების პერიოდი და გვეზრუნა საკუთარ და ერთმანეთის ჯანმრთელობაზე და აცრა გაგვეკეთებინა!" — ვკითხულობთ ფეისბუქ გვერდზე.

განცხადების მიხედვით, სკოლაში მასწავლებელთა 40% სრულად აცრილია, დანარჩენებს კი პირველი დოზა უკვე გაკეთებული აქვთ და სასწავლო წლის დაწყებამდე სრულად ვაქცინირებულნი იქნებიან.

"ჩვენს ქვეყანაში კი არა, მთელ პლანეტაზე შექმნილი მძიმე ეპიდსიტუაციის გამო, როცა ვერაგი ვირუსი განსაკუთრებულად საშიში გახდა პატარებისთვის, როცა ყოველდღიურად იღუპებიან ადამიანები, თქვენი და ჩვენი შვილებისთვის, მათი ღიმილიანი სახეებისთვის, მათი კეთილდღეობისთვის, თქვენც გაიკეთეთ აცრა. #აცრაარკლავს!!!! ერთად ვიბრძოლოთ ამქვეყნად ყველაზე ძვირფასის — შვილების სიცოცხლის გადასარჩენად!" — ვკითხულობთ განცხადებაში.

შეგახსენებთ, რომ 20 აგვისტოს მონაცემებით, საქართველოში კორონავირუსის 4 743 ახალი შემთხვევა დადასტურდა, გამოჯანმრთელდა 3 393, ხოლო გარდაიცვალა — 59 ადამიანი. პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა ნახევარ მილიონს აჭარბებს.