ბათუმში 11-12 მარტს მომხდარი არეულობის შედეგად, აქციის მონაწილეებმა კერძო პირების საკუთრებაში მყოფი ორი, ხოლო საპატრულო პოლიციის ხუთი მანქანა გაანადგურეს.

შინაგან საქმეთა სამინისტროში On.ge-ს უთხრეს, რომ ზარალის ღირებულება ჯერჯერობით დათვლილი არაა.

ქალაქში არსებული დაზიანებების აღსადგენად, ბათუმის მერია 150 ათასი ლარს დახარჯავს.

11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.

შინაგან საქმეთა სამინისტრომ გამოძიება ორი მუხლით დაიწყო.