ბათუმის მერიის პრესსამსახურის ინფორმაციით, 11-12 მარტს ბათუმში მომხდარი არეულობის შედეგად ზარალი დაახლოებით 150 000 ლარამდე შეადგენს და ამდენივეა გამოყოფილი მის აღმოსაფხვრელად.

უწყებაში On.ge-ს უთხრეს, რომ ქალაქში დაზიანებები უკვე შეკეთებულია:

"რაც იყო დაზიანებული ქალაქში, აღმოიფხვრა უკვე, მერიის შესაბამისი სამსახურები დილის 5 საათიდან მუშაობდნენ, ქალაქი დაასუფთავეს მათ და გადარეცხეს, დამწვარი იყო ხე და ის მოჭრეს, დაზიანებული იყო მცენარეები, ისინიც აღადგინეს და ახლით ჩაანაცვლეს.

პრობლემა ჰქონდა ქვაფენილებს და გაკეთდა უკვე, სარეაბილიტაციო სამუშაოები ჩატარდა და აღდგა ქვაფენილი, ახლით ჩანაცვლდა, ასევე გზაგამყოფ დეკორატიულ ღობესთან დაკავშირებით, დაკარგულია 25 ერთეული, დანარჩენებს რეაბილიტაცია უტარდებათ. ახლით ჩანაცვლდა 15 ერთეული საგზაო ნიშნები.

შუქნიშნებს აქვთ პრობლემა და მათი ახლით ჩანაცვლება გახდება საჭირო, 120 ათას ლარამდე მხოლოდ ამ ჭკვიან შუქნიშნების შეცვლაში დაიხარჯება, ხოლო დანარჩენი თანხა გადანაწილდება დანარჩენ ინფრასტრუქტურულ ცვლილებებზე".

რაც შეეხება მოქალაქეების დაზიანებულ ავტომობილებს, ბათუმის მერიაში აცხადებენ, რომ ამ ზარალის ანაზღაურება მათ კომპეტენციაში არ შედის.

11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.

შინაგან საქმეთა სამინისტრომ გამოძიება ორი მუხლით დაიწყო.