საქართველოს პრემიერმინისტრი, ირაკლი ღარიბაშვილი ამტკიცებს, რომ 2 ოქტომბრის არჩევნების შემდეგ, ქვეყანაში სამი წელი არჩევნები აღარ იქნება. ამის შესახებ მან ჩოხატაურის მერობის კანდიდატის წარდგენაზე ისაუბრა.

"მინდა, ასევე, გითხრათ, რომ თვითმმართველობის არჩევნების შემდეგ, ქვეყანაში 3 წელი აღარ გვექნება არჩევნები და ეს პერიოდი უნდა გამოვიყენოთ იმისთვის, რომ რეალური საქმე ვაკეთოთ, რეალური, რომელიც მართლაც ძალიან ბევრი გვაქვს გასაკეთებელი. ქვეყნის საქმეა გასაკეთებელი და ჩვენს მოსახლეობას ბოლომდე უნდა დავუდგეთ გვერდში", — განაცხადა მან.

ქართულ ოცნებასა და ოპოზიციას შორის დადებული 19 აპრილის შეთანხმება, რომელიც ევროპული საბჭოს პრეზიდენტის, შარლ მიშელის ეგიდით შეიქმნა, ითვალისწინებდა რიგგარეშე არჩევნებს იმ შემთხვევაში, თუ მმართველი გუნდი 2 ოქტომბერს 43%-ზე ნაკლებს აიღებდა. 28 ივლისს ქართული ოცნება შეთანხმებიდან გავიდა და დოკუმენტი ანულირებულად გამოაცხადა. ახლა ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები 2024 წლამდე არ ჩატარდება.

გაიგეთ მეტი: