როგორც შინაგან საქმეთა მინისტრმა, გიორგი მღებრიშვილმა განაცხადა, 11-12 მარტს, ბათუმში მომხდარი არეულობის შემდეგ, სამართალდამცველების მიერ დაკავებული 40-მდე პირიდან, სასამართლომ შვიდს ადმინისტრაციული პატიმრობა შეუფარდა, ხოლო დანარჩენები ხელწერილის საფუძველზე გათავისუფლდნენ.

ამ დროისთვის ქალაქში მდგომარეობა კონტროლს ექვემდებარება. რაც შეეხება ზარალს, ამასთან დაკავშირებით, ინფორმაცია ჯერჯერობით არ ვრცელდება.

რუსთავი 2-ის ინფორმაციით, პრევენციის მიზნით, ბათუმის შესასვლელში თბილისიდან ჩასული სპეციალური დანიშნულების რაზმია მობილიზებული.

რაც შეეხება აჭარის პოლიციის ხელმძღვანელის წინააღმდეგ დაწყებული კამპანიის ავტორს, მერაბ ღოღობერიძეს, რუსთავი 2-ის ინფორმაციით, ის ამ დრომდე დაკითხვაზე დაბარებული არ არის.

11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.

შინაგან საქმეთა სამინისტრომ გამოძიება ორი მუხლით დაიწყო.