თალიბანმა ქაბულის სამხრეთით მდებარე ქალაქი, პულ-ე-ლამი დაიკავა. ინფორმაციას ამის შესახებ Reuters ავრცელებს და აღნიშნავს, რომ ეს ქაბულთან დამაკავშირებელი ერთ-ერთი მთავარი კარიბჭეა.

მედიის ცნობით, მას შემდეგ, რაც თალიბანი ქაბულს კიდევ უფრო მიუახლოვდა, ავღანეთის პრეზიდენტმა, აშრაფ ღანმა გადაუდებელი მოლაპარაკებები გამართა ადგილობრივ ლიდერებსა და საერთაშორისო პარტნიორებთან და განაცხადა, რომ ახლა არასტაბილურობისა და ძალადობის თავიდან აცილების მიზნით, ყველა ზომა ტარდება. Reuters-ის განცხადებით, მას არ უპასუხია მისი გადადგომის შესახებ თალიბანის მოთხოვნისთვის და აღნიშნა, რომ ახლა პრიორიტეტი ქვეყნის უსაფრთხოებაა.

13 აგვისტოს თალიბანმა ავღანეთის სიდიდით მეორე ქალაქი, ყანდაარი აიღო. მედიების განცხადებით, მისი აღება თალიბანისთვის, ჯერჯერობით, ყველაზე მნიშვნელოვანი მოგებაა. ასევე, 12 აგვისტოს თალიბანმა აიღო ქვეყნის სიდიდით მესამე ქალაქი — ჰერათიც, რის შემდეგაც აშშ-მ მოუწოდა ამერიკელებს, დაუყოვნებლივ დატოვონ ავღანეთი და დასახმარებლად 3 000 სამხედროს გაგზავნა, რათა უზრუნველყონ საელჩოს თანამშრომელთა უსაფრთხო დაბრუნება.

ავღანეთში ძალადობა მას შემდეგ გაიზარდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, დასრულდება. აშშ-მ მთავარი სტრატეგიული წერტილი — ბაგრამის ავიაბაზა, უკვე დატოვა. ავღანეთში ამერიკელ სამხედროთა მხოლოდ მცირე ჯგუფი რჩება და ისინი საელჩოს დაიცავენ. ივნისის ბოლოს The Wall Street Journal-მა აშშ-ის დაზვერვის სამსახურთან დაახლოებული პირების ინფორმაციაზე დაყრდნობით გაავრცელა, რომ დაზვერვის სამსახურის დასკვნით, რომელიც ჯერ ოფიციალურად არ გამოქვეყნებულა, აშშ-ის ძალების მიერ ავღანეთის დატოვებიდან 6 თვეში შესაძლოა, ქაბულის მთავრობა დაეცეს.

გაიგეთ მეტი: