აჭარის მთავრობის თავმჯდომარემ ზურაბ პატარაძემ მოამბის ეთერში ჩართვისას განაცხადა, რომ მან მინისტრისგან დაკავებულების გათავისუფლების პირობა მიიღო.

პატარაძე ამჟამად სტამბოლში იმყოფება და ბათუმისკენ გამგზავრებას აპირებს. მისი თქმით, იგი რამდენიმე საათში მივა შსს-ს ქვედანაყოფთან, სადაც ახლა აქცია იმართება:

"პირადად ვესაუბრე და ვთხოვე შინაგან საქმეთა მინისტრს. მე ვფიქრობ, რომ დეტალურად შეისწავლიან თითოეულ შემთხვევას. არსებობს შესაბამისი ჩანაწერები, აუდიო და ვიდეო მასალა. ჩვენ კანონის ფარგლებში ვიმოქმედებთ. მე პირადად ვიღებ პასუხისმგებლობას, სულ რაღაც 2-3 საათში მე პირადად შევუერთდები მათ. მე პირადად მივალ შსს-ს შესაბამის ქვედანაყოფში და მინდა ხაზგასმით აღვნიშნო, რომ მე ვთხოვე პირადად შს მინისტრს და მივიღე მისგან გარანტია, რომ მაქსიმუმ ერთ საათში ყველა ადამიანი იქნება გათავისუფლებული".

აჭარის პოლიციის მთავარ სამმართველოსთან უკვე რამდენიმე საათია საპროტესტო აქცია მიმდინარეობს. აქციის მონაწილეები აჭარის პოლიციის უფროსის, კახა ბუხრაძის გადადგომასა და დაკავებულების გათავისუფლებას ითხოვენ.