აჭარის ტელევიზიის ინფორმაციით, ბათუმში აქციის მონაწილეები მსვლელობით გაემართნენ და შსს-ს მთავარი სამმართველოს შენობასთან გადაინაცვლეს, სადაც დაკავებულები იმყოფებიან. აქცია ბათუმი პლაზას ტერიტორიაზე დღეს დაახლოებით 18 საათიდან მიმდინარეობდა.

მანამდე, საპატრულო პოლიციის წარმომადგენლებმა ორი პირი დააკავეს. შსს-ში On.ge-ის განუცხადეს, რომ მოძრაობის შეფერხებისთვის დააჯარიმეს ერთი პირი, რომელმაც პოლიციას წინააღმდეგობა გაუწია და სიტყვიერი შეურაცხყოფა მიაყენა. შსს-ს მტკიცებით, მას გამოესარჩლა მეორე პირიც და პოლიციას ხელი შეუშალა სამუშაოს შესრულებაში. ამჟამად ისინი დაკავებულები არიან, პოლიციისადმი დაუმორჩილებლობის ბრალდებით.

მოგვიანებით, აქციის მიმდინარეობისას, ისევ დაუმორჩილებლობის ბრალდებით, კიდევ სამი პირი დააკავეს, რაც შსს-მ On.ge-ის დაუდასტურა.

აქციის მონაწილეები აჭარის საპატრულო პოლიციის უფროსის, ასევე ბათუმის პოლიციის უფროსის გადადგომასა და დაკავებულების გათავისუფლებას მოითხოვენ. ისინი პატრულის მხრიდან გახშირებულ ჯარიმებს აპროტესტებენ.