პენტაგონის გადაწყვეტილებით, აშშ-ში ჯარისკაცებისთვის ვაქცინაცია სავალდებულო გახდება. პრეზიდენტის ადმინისტრაციამ დააანონსა, რომ არა უგვიანეს სექტემბრის შუა რიცხვებამდე აშშ-ის 1.3 მილიონი აქტიური ჯარისკაცისთვის ვაქცინაცია სავალდებულო იქნება, რათა ქვეყანა COVID-19-ის ახალ, დელტა შტამს გაუმკლავდეს.

პენტაგონში აცხადებენ, რომ სავალდებულო ვაქციანციას აგვისტოს ბოლოდან გეგმავდნენ, თუმცა ამ ეტაპზე გადაწყვიტეს, აშშ-ის სურსათისა და წამლის ადმინისტრაციის (F.D.A.) პასუხს დაელოდონ, რომელმაც ვაქცინა საბოლოოდ უნდა დაამტკიცოს. თავდაცვის მდივანი, ლოიდ ოსტინი აცხადებს, რომ საჭიროების შემთხვევაში, იგი უყოყმანოდ დაიწყებს მოქმედებას ან პრეზიდენტს სხვა კურსს ურჩევს, თუკი ამის საჭიროებას დაინახავს.

ოსტინი ასევე ამბობს იმასაც, რომ პროცესი შეძლებისდაგვარად დაჩქარდება, რათა მოკლე დროში რაც შეიძლება მეტი ჯარისკაცი აიცრას, მანამდე კი, მოუწოდებს შესაბამის სამსახურებს, სავალდებულო ვაქცინაციისთვის მობილიზება დაიწყონ.

პრეზიდენტმა ჯო ბაიდენმა მიმართა კერძო სექტორსა და მთავრობასაც, აქტიურად ჩაერთონ COVID-19-ის წინააღმდეგ დაწყებულ კამპანიაში და ხელი შეუწყონ ჯერ კიდევ აუცრელი მოსახლეობის ინფორმირებასა და ვაქცინაციას.

ამ დროისთვის აშშ-ში ჯარისკაცების 64% სრულად ვაქცინირებულია, რასაც პენტაგონი დაბალ მაჩვენებლად მიიჩნევს და ცდილობს, ამ რიცხვის მაქსიმალურად გასაზრდელად შესაბამისი ღონისძიებები გაატაროს.