საქართველოს ახალგაზრდა იურისტთა ასოციაციის ანალიტიკოსი, მარიამ ლაცაბიძე აცხადებს, რომ პრემიერმინისტრის ინიციატივა საჯარო მოხელეებისთვის ხელფასების ზრდის თაობაზე გულის მოგებაზე იყო გათვლილი. მისივე თქმით, ამ მხრივ ხელისუფლებას აქვს ბუნებრივი უპირატესობა აღნიშნულზე მან On.ge-სთან ისაუბრა.

"ზოგადად, ზღვარი წინასაარჩევნო კამპანიისას მმართველ პარტიას და სახელმწიფოს შორის ყოველთვის ფაქიზად უნდა გავავლოთ. შარშან ბევრი ისეთი ინიციატივა იყო ხელისუფლების მხრიდან, რა დროსაც ეს ზღვარი იყო დარღვეული, შესაბამისად, ამ შემთხვევაში პრემიერმინისტრის ინიციატივამაც დაიმსახურა ჩვენი ყურადღება და აშკარაა, რომ ხელისუფლებას ყოველთვის აქვს ბუნებრივი უპირატესობა, შესაბამისად, ასეთი ინიციატივების წარდგენის დროს ის უნდა იყოს ფრთხილად. ამ კონკრეტულ შემთხვევაში, ეს ინიციატივა ნამდვილად იყო გულის მოგებაზე გათვლილი, თუმცა კანონდარღვევა არ არის, რადგან რეალურად სახელისუფლებო ინიციატივაა ", — განაცხადა ლაცაბიძემ.

თვითმმართველობის არჩევნებამდე 2 თვეზე ნაკლებია დარჩენილი პრემიერმინისტრი კი საჯარო მოხელეებისთვის ხელფასების ზრდაზე ალაპარაკდა. მისი თქმით, 2022 წლის იანვრიდან ეტაპობრივად დაიწყებენ მათი ხელფასების ზრდას.