ყოფილი მე-12 პენიტენციური დაწესებულების, ე.წ. ორთაჭალის ციხის ტერიტორიაზე კულტურული სივრცე გაიხსნება. ალტერნატიული კულტურული სივრცე N12 — ასე ერქმევა სივრცეს, რომელიც 10 აგვისტოს, მარნეულის კულტურის ცენტრის თეატრალური დასის სპექტაკლით, მარინა რევია (რეჟისორი გოჩა ხვიჩია) გაიხსნება.

"მულტიფუნქციური სივრცით სარგებლობა ნებისმიერ ხელოვანს შეეძლება. პროფესიულ თუ მოყვარულ დასებს როგორც თბილისიდან, ისე რეგიონებიდან, საშუალება ექნებათ, ისარგებლონ სარეპეტიციო სივრცით, გამართონ სპექტაკლები, კონცერტები და სხვადასხვა შემეცნებითი ღონისძიებები", — ვკითხულობთ კულტურის, სპორტისა და ახალგაზრდობის სამინისტროს მიერ გავრცელებულ განცხადებაში.

კულტურის სამინისტროში ამ ფაქტს უპრეცენდენტოს უწოდებენ და აცხადებენ, რომ ადგილი, რომელიც მძიმე ისტორიებით დაამახსოვრდა საზოგადოებას, კულტურის მოღვაწეთა შეკრების ადგილად გადაიქცევა.