საქართველოს პარლამენტის წევრის, სალომე სამადაშვილის თქმით, მთავარი არხის დირექტორის, ნიკა გვარამიას მიერ გავრცელებული, სავარაუდოდ, სუს-ის ჩანაწერები მოულოდნელი არავისთვის ყოფილა, რადგან აქამდეც ბევრჯერ ყოფილა შემთხვევა, როცა ადამიანებს ფარულად უსმენდნენ.

„ჩემთვის ძალიან შემაშფოთებელი ის არის, რომ ჩვენი საზოგადოება გასული თხუთმეტი წლის მანძილზე იმდენჯერ დადგა ამ პრობლემის წინაშე, რომ ჩვენ მე მგონი დავკარგეთ აღქმა სიმწვავის, რამდენად მწვავე პრობლემაა ეს და როგორ ირღვევა ადამიანის ფუნდამენტური უფლება ფარული მიყურადებით. [...]

ეს არის ძალიან სახიფათო, იმიტომ რომ ნებისმიერ მოქალაქეს უნდა ესმოდეს, რომ ხვალ ნებისმიერ მოქალაქეს შეუძლიათ ასევე უკანონოდ მოუსმინონ, უთვალთვალონ, და ეს არის სწორედ ავტოკრატიული რეჟიმი, აი, ასე ამყარებს კონტროლს და ეს არის სწორედ ქართული ოცნების ხელწერა", — აცხადებს სამადაშვილი.

მას შემდეგ, რაც ჟურნალისტმა აღნიშნა, რომ მმართველი პარტიის წარმომადგენლების აზრით, გვარამიას მიერ გამოქვეყნებული დოკუმენტები არაფერს ნიშნავს, სალომე სამადაშვილმა თქვა, რომ სხვა კომენტარს ქართული ოცნებისგან არავინ ელოდებოდა, რადგან საქმე გვაქვს ამორალურ ხელისუფლებასთან, რომელიც ყველაფერზეა წამსვლელი.

"დარჩნენ მხოლოდ და მხოლოდ ის ადამიანები, რომლებიც მზად არიან, რომ ყველაფერს ხელი მოაწერონ ქართული ოცნების გამართლების, მათთვის პირის მოწმენდის მიზნით. არც ერთი ადამიანი, ვინც დღეს ქართული ოცნების სახელით საუბრობს, არანაირი ღირებულების მატარებელი არ არის, არც საკონსტიტუციო უფლებების დაცვის და საერთოდ არანაირი" — ამბობს ის.

• ჩემთვის ეს არის მორიგი ფეიკ ნიუსი — თალაკვაძე გვარამიას მიერ გასაჯაროებულ დოკუმენტებზე
• ნეტა ყველამ მისმინოს და გაითვალისწინოს რასაც ვამბობ — დავითულიანი ფარულ მოსმენაზე

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.