მთავარი არხის დირექტორმა, ნიკა გვარამიამ თავის გადაცემაში განაცხადა, რომ სახელმწიფო უსაფრთხოების სამსახურის დოკუმენტები მოიპოვა, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. გვარამიას თქმით, დოკუმენტებში იკვეთება, რომ სუს-ი ამ ადამიანების პირად ცხოვრებას, ასევე, პირად, როგორც პირისპირ, ისე სატელეფონო საუბრებს უსმენს და უკანონო ჩანაწერებს აკეთებს.

სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან.

როგორც მთავარი არხის დირექტორი ამბობს, ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

"ადამიანები, ვინც თავისუფლად სუნთქვის მტერია ამ ქვეყანაში, ემსახურება ბიძინა ივანიშვილს და უმძიმეს დანაშაულებს ჩადის, სახელმწიფო უსაფრთხოების სამსახურის უფროსი, გრიგოლ ლილუაშვილი, სახელმწიფო უსაფრთხოების სამსახურის უფროსის მოადგილე, ლევან ახობაძე, ეს ადამიანი 2020 წელს იყო სუდ-ის, ე.წ. სახელმწიფო უსაფრთხოების დეპარტამენტის, სწორედ იმ დეპარტამენტის, რომელიც ამ ყველაფერს ახორციელებს, ხელმძღვანელი 2020 წლის შემდეგ ის დააწინაურეს დანიშნეს სუს-ის, ანუ ლილუაშვილის მოადგილედ და სუდ-ის კურატორად. მესამე — სუს-ის ოპერატიულ-ტექნიკური სააგენტოს დირექტორი, კოკა კობიძე. ეს არის ადამიანი, რომელიც ტექნოლოგიურად და ტექნიკურად უზრუნველყოფს კანონიერსაც და უკანონო ფარულ მიყურადებას, თვალთვალს და ამის შენახვას", — განაცხადა მან.

გვარამიას თქმით, მასალა, რომელსაც ჰქვია ოპერატიული კრებსი — პირადი ცხოვრება სუს (სუტ), 2020 წლის წინასაარჩევნო პერიოდშია ჩაწერილი.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.

"შემიძლია დავადასტურო, რომ მსგავსი საუბარი ჩემსა და გიორგი ონიანს შორის ნამდვილად შედგა. ანუ, ჩვენს საუბარს აყურადებდნენ", — წერს მშვენიერაძე ფეისბუქზე.

კერძოდ, ჩანაწერების მიედვით, ონიანს, მშვენიერაძეს და იმნაძეს საუბარი ჰქონდათ 2020 წელს სოციალური სამართლიანობის ცენტრის წევრის, თამთა მიქელაძის სუს-ში დაბარების შესახებ და ამბობდნენ, რომ ამ საკითხზე ერთობლივ განცხადებას გააკეთებენ.