"ნეტა, ყველამ მისმინოს და გაითვალისწინოს, რასაც ვამბობ" — ასე პასუხობს ქართული ოცნების დეპუტატი, ბექა დავითუალიანი კითხვას, დარწმუნებულია თუ არა იმაში, რომ მას არ უსმენენ. გვარამიას მიერ გასაჯაროებული, სავარაუდოდ, სუს-ის დოკუმენტების განხილვისას მან განაცხადა, რომ მიყურადებას, მოსმენას და თვალთვალს აქვს თავისი საკანონმდებლო ჩარჩო. დავითულიანი ამტკიცებს, რომ მოსმენებისგან დღეს ბევრად უფრო დაცულები ვართ, ვიდრე ოდესმე.

"თქვენ აკეთებთ ინტერპრეტაციას, კანონი ითვალისწინებს ფარულ მოსმენა-მიყურადებას. კანონის ფარგლებში შეიძლება მოსმენა, საჭიროების შემთხვევაში, სისხლის სამართლის საქმეზე, თუ არ შეიძლება, არსებობს სასამართლო, შეგიძლიათ მომართოთ. [...]

დღეს ოპერატორები, რომლებიც ფლობენ გასაღებს ჩვენი მობილური კავშირების და საკომუნიკაციო საშუალებების, სასამართლო ბრძანების გარეშე და ინსპექტორის დაშვების გარეშე, კანონიერად ვერ მოგისმენენ. რაც შეეხება ახლა უკანონოს, არ ვიცი, ვიღაცას შეიძლება, ედგას რაღაც აპარატი და მომისმინოს, საერთოდ სხვამ", — განაცხადა დავითულიანმა.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.