ოლიმპიური თამაშები სპორტსმენებისთვის მეტად დაძაბული პერიოდია, ამიტომ, ალბათ არაა გასაკვირი, რომ თუკი ვინმეს სავარჯიშო და საძინებელი ოთახები ერთმანეთში აერევა. ყოველ შემთხვევაში, დაახლოებით, ასე მოხდა ტოკიოს ოლიმპიადაზე, სადაც სპორტსმენებმა ოლიმპიურ სოფელში მუყაოსგან დამზადებული საწოლების გამძლეობის შემოწმება გადაწყვიტეს.

"ბევრი კითხვა გაჩნდა ოლიმპიური სოფლის საწოლებთან დაკავშირებით, ასე რომ, დღეს ერთად შევამოწმებთ და გავიგებთ, რამდენი ისრაელელია საჭირო, რომ მუყაოს ერთი საწოლი გატყდეს", — ამბობს ვირუსულად გავრცელებულ ვიდეოში სპორტსმენი ბენ ვანგერი.

ისრაელის დელეგაციის წევრის მიერ ტიკტოკზე გამოქვეყნებულ ვიდეოში 8 სპორტსმენი ჩანს, რომელიც საწოლზე დახტუნავს. როგორც ჩანს, მეცხრე ათლეტის დამატებას საწოლმა ვეღარ გაუძლო და ნაწილ-ნაწილ, ლეიბითურთ დაიშალა.

"ვინმეს ზედმეტი საწოლი ხომ არ გექნებათ?", — კითხულობს ვანგერი ვიდეოს აღწერაში.

@bwangah

Anyone got an extra bed for me? 😅 #OlympicTok

♬ Bad Habits - Ed Sheeran

ოლიმპიურ სოფელში მუყაოს საწოლების გამოყენება ტოკიოს ოლიმპიადასთან დაკავშირებული ერთ-ერთი ყველაზე განხილვადი საკითხი იყო. გავრცელებული ხმების მიხედვით, საწოლები სპეციალურად დამზადდა არამყარი მასალისგან, რათა შეჯიბრების მონაწილეებს ერთმანეთთან სექსი, ანუ არასასურველი ფიზიკური კონტაქტი პანდემიის პირობებში, არ ჰქონოდათ. ეს ინფორმაცია The New York Times-მა და სხვა გამოცემებმა უარყვეს, ოლიმპიური სოფლის გენერალურმა მენეჯერმა კი განაცხადა, რომ საწოლი 200 კილოგრამამდე მასას უძლებდა.

ასევე იხილეთ:

აღსანიშნავია, რომ საწოლები, რომლებიც იაპონურმა კომპანია Airweave-მა ჯერ კიდევ გასული წლისთვის დაამზადა, გადამუშავებადია.

სხვათა შორის, საწოლების გამძლეობის შემოწმება ოლიმპიადის სხვა მონაწილეებმაც სცადეს სხვადასხვა ფორმით: ზოგმა მასზე გულფილტვის რეანიმაცია ჩაატარა, ზოგმა კი იოგაში ვარჯიში გადაწყვიტა.

საბოლოოდ, ტოკიოს ოლიმპიური სოფლის საწოლები იმდენად ცნობილი ტრენდი გახდა, რომ ჰეშტეგით #cardboardbed (მუყაოს საწოლი) გამოქვეყნებულ ვიდეოებს ჯამში თითქმის 6 მილიონი ნახვა აქვს.