ვაქცინირებულმა სასულიერო პირებმა, არქიმანდრიტმა ილიამ და დოროთიმ ვაქცინაციის მნიშვნელობაზე ისაუბრეს და განაცხადეს, რომ ამ საკითხში საზოგადოება ექიმებს უნდა ენდოს. მამა დოროთი ამბობს, რომ არცერთ სასულიერო პირს არ აქვს უფლება, მრევლს ვაქცინაცია აუკრძალოს და მათ არა კონკრეტული მღვდლის, არამედ სინოდის განჩინებით უნდა იხელმძღვანელონ, სადაც წერია, რომ ვინც ვაქცინას გაიკეთებს, დევნის ობიექტი არ უნდა გახდეს.

"ჩემი მოწოდება არ არის ეკლესიის მოწოდება და არც რომელიმე მღვდლის მოწოდება არ არის ეკლესიის მოწოდება. ჩვენ ყველაზე მეტად უნდა ვენდობოდეთ არა მე [მღვდელს] ან ვიღაცას, არამედ იმას, რაც თქვა სინოდმა. სინოდმა განაცხადა, ვისაც სურვილი აქვს ეს გაიკეთოს და არცერთ მღვდელს არ აქვს უფლება, რომ ვინმეს აუკრძალოს ვაქცინის გაკეთება და უთხრას, რომ ეს არის სატანის რაღაც. ამის უფლება მღვდელს არ აქვს, იმიტომ, რომ სინოდმა თქვა, არ უნდა იყოს დევნის ობიექტი, ვინც გაიკეთებს და არც ის, ვინც არ გაიკეთებს.

აქედან გამომდინარე, ეკლესია არის სინოდი და არა რომელიმე მღვდელი, ამიტომ თქვენც არ მიაქციოთ დიდი ყურადღება, ნუ გაარეკლამებთ იმ ადამიანებს, ვინც ანტივაქსერია", — განაცხადა მან TV პირველის ეთერში.

მამა ილია ამბობს, რომ როცა მრევლი ჯანმრთელობის პრობლემებზე კითხვებს უსვამს, ის მოუწოდებს ექიმთან წავიდეს, რადგან ის პასუხისმგებლობას ვერ აიღებს იმაზე, რაც არ იცის. მისი თქმით, ვაქცინა იმიტომ გაიკეთა, რომ ასეთ დროს ექიმებს უნდა ვენდოთ.

"ეს არის ძალიან დიდი პასუხისმგებლობა, მარტო ის ხომ არ არის, რომ მე გავხდები ავად. ეს არის საშიში, შეიძლება მე გადავდო სხვა ადამიანს. ტაძარში მოდიან, აღსარებაზე მოდის, ნათლობებია, ურთიერთობები გვაქვს ადამიანებთან და მე ხომ ჩემი წილი პასუხისმგებლობა მაქვს ადამიანებთან. ეს რომ იყოს ისეთი ავადმყოფობა და სხვა არ გადადებს, სხვა არის, მაგრამ ეს ისეთია, რომ შენი უყურადღებობით შეიძლება სხვა ადამიანიც დააზიანო", — განაცხადა მან.

ამ საკითხზე ისაუბრა მამა დოროთიმაც და აღნიშნა, რომ თუ ექიმები მღვდლებს ენდობიან იმ საკითხებში, რაც მათ იციან, მღვდლებიც უნდა ენდონ ექიმებს იმაში, რაც მათ უკეთ ესმით.

"ანტივაქსერები ყველგან არიან. მე ეს ფოტო რომ დავდე, იქ მე პასუხისმგელობას ვრძნობდი. ასე თუ ისე, ბევრი მაყვედრიდა რეკლამას რატომ აკეთებო. მე ეს შენთვის არ გამიკეთებია, მე გავიკეთე. ეს რეკლამად თუ მიიღებ, მიიღე და თუ ჩემი არ გჯერა, ნუ გაიკეთებ. ორი პასუხისმგებლობაა — ერთი ადამიანი, რომელიც ამბობს, რომ არ გაიკეთოთ და მეორე, ვინც ამბობს, მე გავიკეთე და თქვენც გაიკეთეთ.

ამ ორიდან მგონია, რომ ძალიან მძიმე პასუხისმგებლობას იღებს ის ადამიანი, ვინც ამბობს, რომ არ გაიკეთოთ, რადგან ათასები კვდებიან. ძალიან მძიმეა ეს და მე ამ პასუხისმგებლობას ვერ ავიღებ და ადამიანს ვერ ვეტყვი. [...]

ჩვენ მრევლში გვყავს ძალიან ბევრი ექიმი, არამარტო ჩვენ, ეკლესიას. ჩვენ ექიმები გვენდობიან, გვანდობენ სულს და რა უფლება მაქვს, რომ ამ ექიმებს ჩემი ხორცი არ ვანდო. მე ვენდობი ამ ადამიანებს", — განაცხადა მან.

სასულიერო პირების ნაწილი, მათ შორის სინოდის ზოგიერთი წევრი ვაქცინაციასთან დაკავშირებით შეთქმულების თეორიებსა და დეზინფორმაციას ავრცელებს. ისინი მრევლს ანტივაქსერულ მოწოდებებს აძლევენ. შედეგად მოსახლეობის ნაწილი ფიქრობს, რომ ვაქცინა სახიფათოა, რაც სიმართლეს არ შეესაბამება. ვაქცინების ეფექტურობა დამტკიცებულია არაერთი კვლევით და აღიარებული მრავალი საერთაშორისო ორგანიზაციის მიერ.