ჯანდაცვის მინისტრის მოადგილის, თამარ გაბუნიას განცხადებით, პფაიზერის ვაქცინაზე რეგისტრაციის დროს 4 750 პირს ჯავშანი არ დაუდასტურდა. მინისტრის მოადგილის თქმით, ამ 4 750 გაუქმებულ ჯავშანს უკავშირდება ისეთი მიზეზები, როგორიცაა ბუსტერ დოზაზე დარეგისტრირების მცდელობა, ან უკვე ორჯერ აცრილმა ადამიანმა, იმის გამო რომ შეემოწმებინა როგორ მუშაობდა საიტი, მისი მონაცემები შეიყავანა და დაიკავა ერთი ადგილი.

"147 000-მდე პირი დარეგისტრირდა სულ. 4 750 პირს ჯავშანი არ დაუდასტურდა, გამომდინარე იქიდან, რომ მათი ნაწილი უკვე ვაქცინირებული დარეგისტრირდა. ასევე, იყვნენ მოქალაქეები, რომელთაც რიგი მიზეზების გამო აცრის გაკეთება ჯერ არ უწევდათ, თუმცა მათ თავიანთი მონაცემები პორტალზე მაინც შეიყვანეს. ასე რომ, რეალურად, 5 000-მდე ჯავშანი არ შედგა და ეს ადგილები, ბუნებრივია, დაემატება პორტალს", — განაცხადა გაბუნიამ.

მისივე თქმით, დღეს, დღის ბოლომდე ისინი დეტალურად დააანონსებენ დამატებით ადგილებს, მათ შორის, იმ 4 750 ადგილს, რომელიც მას შემდეგ დარჩა, რაც რეგისტრაცია არ დადასტურდა.

"დღესაც გამოვაცხადებთ, ხვალაც გამოვაცხადებთ ადგილების დამატებას და შეუძლიათ, კიდევ დარეგისტრირდნენ. ასევე, სატელეფონო ჩაწერაც გრძელდება 15 22-ის საშუალებით", — თქვა მან.

გაბუნიას თქმით, ადგილების შევსება უპირატესად თბილისში იგეგმება, რადგან მოთხოვნა ყველაზე დიდია.