საქართველოს პრემიერმინისტრი გიორგი კვირიკაშვილი სტრასბურგის სასამართლოს მიერ მიღებულ გადაწყვეტილებას, რუსთავი 2 საქმეზე, პირველად ეხმაურება და აცხადებს, რომ სიტუაცია ხელოვნურადაა გაზვიადებული და პოლიტიზირებული ხოლო აჟიოტაჟი მალე ჩაცხრება:

"ესაა 2 კერძო სუბიექტს შორის დავა და სწორედ ამ ჭრილში გაგრძელდება ეს პროცესი. არანაირი გაზვიადება ამ მოვლენის ჩვენ არ გვმართებს. ეს არის ჩვეულებრივი ამბავი. ჩვენ რა თქმა უნდა გავაგრძელებთ ჩვენი მხრიდან ინფორმაციის მიწოდებას. საერთოდ მგონია, რომ ეს საკითხი იყო როგორც თავიდანვე გაზვიადებული და პოლიტიზირებული, ასე რჩება დღესაც".

კვირიკაშვილი ევროპარლამენტარების მიერ მის მიმართ გამოგზავნილ წერილსაც ეხმაურება და აღნიშნავს, რომ მისი პასუხი უკვე მომზადებულია და ის მალე გამოქვეყნდება:

"წერილის შინაარსი ჩემთვის ცნობილია, ჩვენ საპასუხო წერილიც მოვამზადეთ, რომელიც გამოქვეყნდება. საქართველოში არანაირი საფრთხე სიტყვის თავისუფლებას არ ემუქრება. აჟიოტაჟი, რომელიც ხელოვნურად იქნა შექმნილი მალე ჩაცხრება და საქართველო აგრძელებს ჩვეულებრივ ცხოვრებას. ევროპული მომავლის შექმნას და არავითარი საფრთხე დემოკრატიზაციის კუთხით საქართველოში არ არსებობს".

სტრასბურგის ადამიანის უფლებათა ევროპულმა სასამართლომ, უზენაესი სასამართლოს გადაწყვეტილების აღსრულება, რუსთავი 2-ის საქმეზე, უვადოდ შეაჩერა. რუსთავი 2-ის გენერალური დირექტორის ნიკა გვარამიას თქმით, ეს გადაწყეტილება ისტორიულია ევროსასამართლოს ისტორიაში.

ევროპის პარლამენტი მოუწოდებს საქართველოს ხელისუფლებას, ნუ გამოიყენებს სასამართლო სისტემას პოლიტიკურად მომგებიანი შედეგის მისაღებად.