საქართველოს ჟურნალისტური ეთიკის ქარტიაში აცხადებენ, რომ მმართველი პარტიის წარმომადგენლების აგრესიული დამოკიდებულება მედიის მიმართ, ახალისებს ძალადობას ჟურნალისტებსა და ოპერატორებზე. ასე ეხმაურებიან ქარტიაში კულტურის მინისტრის, თეა წულუკიანის მიერ მთავარი არხის ჟურნალისტზე მიკროფონის წართმევას.

"სამწუხაროა, რომ ხელისუფლების წარმომადგენლები აგრძელებენ იგივე დამოკიდებულებას მედიის წარმომადგენლების მიმართ, რაც ახალისებს ძალადობრივ ჯგუფებს და ზოგადად, ძალადობას ჟურნალისტებისა და ოპერატორების მიმართ.

რა თქმა უნდა, თეა წულუკიანის ქმედება ხელის შემშლელი იყო ჟურნალისტებისთვის საქმიანობაში. როგორც ვიცით, ემა გოგოხიას დაცვამაც დაატოვებინა შენობა და მიკროფონი დარჩა თეა წულუკიანს. მისი ასეთი ქმედებები უარყოფითად აისახება მედიაგარემოს უსაფრთხოებაზე საქართველოში", — უთხრა On.ge-ს ჟურნალისტური ეთიკის ქარტიის დირექტორმა, მარიამ გოგოსაშვილმა.

ვიცე-პრემიერმა და კულტურის მინისტრმა, თეა წულუკიანმა მთავარი არხის ჟურნალისტს, ემა გოგოხიას მიკროფონი წაართვა და ამბობს, რომ არ დააბრუნებს. მთავარი არხის მიერ გავრცელებულ ვიდეოში ჩანს, როგორ ართმევს წულუკიანი ჟურნალისტს მიკროფონს, რომელიც კითხვას სვამს. ამის შემდეგ მინისტრი ამ მიკროფონით იწყებს საუბარს და ბიძინა ივანიშვილს მადლობას უხდის. ვიდეოში ისმის, რომ ჟურნალისტი თეა წულუკიანს დეპუტატ თინა ბოკუჩავას ძალის გამოყენებით გაყვანის შესახებ ეკითხება.

გაიგე მეტი: