ვიცე-პრემიერმა და კულტურის მინისტრმა, თეა წულუკიანმა მთავარი არხის ჟურნალისტს, ემა გოგოხიას მიკროფონი წაართვა და ამბობს, რომ არ დააბრუნებს. მთავარი არხის მიერ გავრცელებულ ვიდეოში ჩანს, როგორ ართმევს წულუკიანი ჟურნალისტს მიკროფონს, რომელიც კითხვას სვამს. ამის შემდეგ მინისტრი ამ მიკროფონით იწყებს საუბარს და ბიძინა ივანიშვილს მადლობას უხდის. ვიდეოში ისმის, რომ ჟურნალისტი თეა წულუკიანს დეპუტატ თინა ბოკუჩავას ძალის გამოყენებით გაყვანის შესახებ ეკითხება.

"მოგესალმებით. მე მინდა ვუთხრა მადლობა ბიძინა ივანიშვილს. ვარ ეთერში. რომელი ეთერია... ფორმულას ტელევიზიიდან და ქალბატონი ემა აღარ არის ჟურნალისტი, მე ვარ ჟურნალისტი. ემა, ეხლა რომ დაგსჯიან, ხო იცი. ე.ი., ეს ამხელა ახტაჯანა ქალს წაგართვი მიკროფონი, ხო დაგსჯიან ამისთვის", — უთხრა მან ჟურნალისტს.

ამის შემდეგ წულუკიანი ჟურნალისტს ეუბნება:

"ემა, მოდი, აბა თქვი, ბიძინას გაუმარ...".

გარდა ამისა, კულტურის მინისტრი შეკრებილებს მოუწოდებს, ემა გოგოხიას ტაში დაუკრან.

"დაუკარით ტაში ემას, ემას ტაში დაუკარით, ემას!"

მეტიც, თეა წულუკიანმა Facebook-ზე გამოაქვეყნა ფოტო და წერს, რომ ამიერიდან გაკეთებული საქმეების შესახებ ამ მიკროფონით უნდა "გვაუწყოს". წულუკიანის აზრით, ჟურნალისტი განაიარაღა.

"დღეს, ამ მიკროფონით ვხსნი ქართუ ფონდის მიერ საოცრად რეაბილიტირებულ სენაკის თეატრს! სიმბოლურია. ფორმულას თუ გლავკანალს (ემას ვცნობ და ლოგოს ვერა) კი მოუწევს ისეთი ჟურნალისტის დანიშვნა რეგიონში, რომელსაც, როცა თავს ესხმის უკვე დარბაზში შესულ რესპონდენტს (რომელმაც მანამდე კითხვებს ფოიეში პასუხები გასცა), აქვს შნო, მარტივად არ განაიარაღებინოს თავი ვისმეს. არ დავაბრუნებ! :)))) ამ მიკროფონით უნდა გაუწყოთ ამიერიდან გაკეთებული საქმეების შესახებ", — წერს წულუკიანი.

On.ge ესაუბრა მთავარი არხის საინფორმაციო სამსახურის უფროსს, თეო გილიგაშვილს. მისი თქმით, წულუკიანმა მიკროფონი დაიტოვა, ჟურნალისტი კი დაცვამ დარბაზიდან ძალის გამოყენებით გამოიყვანა.

"ემას წაართვა მიკროფონი, დარჩა დარბაზში მიკროფონით და ემა მისმა დაცვამ გამოათრია გარეთ. ახლა ვიღებ მასალას და ჯერჯერობით არაფრის თქმა არ შემიძლია. ჟურნალისტი იყო ჩასაწერად მისული. ყველა მედიასთან დადგა და ბოლოს, როცა კითხვა დაუსვეს თინა ბოკუჩავაზე იყო თუ არა ძალადობა პაპუაშვილის მხრიდან, წავიდა და კითხვას არ უპასუხა. ემა გაეკიდა ამ კითხვაზე საპასუხოდ, როგორც მიყვება, შეჰყვა დარბაზში. იქ წაართვა მიკროფონი, იღლიცინა, იტინგიცა, ემას ტაში დაუკარითო, მერე დაცვამ ემა გამოათრია და მიკროფონი დაიტოვა წულუკიანმა", — ამბობს თეო გილიგაშვილი.