მას შემდეგ, რაც ბრიტნი სპირსი სასამართლოზე წარსდგა და მოითხოვა, კანონის ძალით მეურვედ დანიშნული მამამისისთვის, ჯეიმს სპირსისთვის, მისი პირადი ცხოვრებისა და კარიერის კონტროლის უფლება ჩამოერთვათ, აშშ-ში სამართლებრივ ცვლილებებზე დაიწყეს ფიქრი, რომელსაც უკვე უწოდებენ "ბრიტნის კანონს".

როგორც The Gurdian წერს, აშშ-ის წარმომადგენელთა პალატაში ახალ კანონზე მუშაობენ, რომელიც ნებისმიერ ადამიანს, ვინც სხვადასხვა მიზეზით კანონიერი მეურვეობის ქვეშ იმყოფება, ექნება შესაძლებლობა, რომ მეურვის შეცვლა მოითხოვოს: მაგალითად, ოჯახის წევრი სახელმწიფო წარმომადგენლით ჩაანაცვლოს.

როგორც ამ ინიციატივის ავტორები, რესპუბლიკელი ნენსი მეისი და დემოკრატი ჩარლი კრისტი ამბობენ, თუ ეს ცვლილება შევა ძალაში, მეურვეობის ქვეშ მყოფ პირებს არ მოუწევთ იმის დამტკიცება, რომ ძალადობის მსხვერპლები არიან და უფრო გამარტივებული მექანიზმებით შეძლებენ მეურვის სხვა უფრო შესაფერისი კანდიდატით ჩანაცვლებას.

"არაჰუმანური მეურვეობა შეიძლება დაუსრულებელ კოშმარს დაემსგავსოს და საუბედუროდ, ისიც კი არ ვიცით, რამდენი ადამიანია ასე დატყვევებული მეურვეობის გაუმართავი სისტემის გამო", — განაცხადა ჩარლი კრისტმა.

"ბრიტნი სპირსის მეურვეობამ საშინელი შედეგები გამოიღო. თუ მსგავსი რამ მას შეიძლება შემთხვეოდა, მაშინ სხვა ნებისმიერიც შეიძლება გახდეს ამის მსხვერპლი", — დასძინა ნენსი მეისიმ.

Variety-ის ცნობით, მიუხედავად იმედისმომცემი ცვლილებების დასაწყისისა, ამ წამოწყებას მხარს არ უჭერენ მოძრაობა The Free Britney (თავისუფლება ბრიტნის) წარმომადგენლები, რომლებსაც მიაჩნიათ, რომ ეს არსებითად ბევრს არაფერს გააუმჯობესებს და უფრო რადიკალური ცვლილებებია საჭირო.

ახალი კანონის ინიციატორები კი აცხადებენ, რომ ფრთხილი და ეტაპობრივი ნაბიჯების გადადგმით უფრო დიდი შანსია, რომ ამ კუთხით ხელშესახებ წარმატებას მიაღწიონ.

ამჟამად ამერიკის შეერთებულ შტატებში 1,3 მილიონი ადამიანი იმყოფება კანონიერი მეურვეობის ქვეშ.

ფოტო საპროტესტო აქციიდან, რომლის მთავარი მოწოდებაცაა "თავისუფლება ბრიტნის".

ფოტო: Michael Buckner / PMC

ბრიტნი სპირსი 2008 წლიდან ფსიქიკური ჯანმრთელობის გაუარესების გამო კანონიერი მეურვეობის ქვეშაა: ცამეტი წელი მის პირად ცხოვრებას, კარიერასა და ფინანსებს მამამისი განკარგავდა. ბოლო წლებში ბრიტნის ფანების მონდომებით ინტერნეტში შეიქმნა მოძრაობა #FreeBritney (თავისუფლება ბრიტნის), რომლის მხარდამჭერებიც ამბობდნენ, რომ ბრიტნი მკაცრი კონტროლის ქვეშ იყო და მისი თავისუფლება უსაფუძვლოდ იყო შეზღუდული.

სასამართლოზე მომღერალმა ეს მოსაზრებები დაადასტურა: მაგალითად, მისი თქმით, თურმე უკრძალავდნენ შვილის გაჩენას, წამლებით აბრუებდნენ და მამამისი სასამართლოს მიერ მინიჭებული მეურვის უფლებებს ბოროტად იყენებდა. "ეს მეურვეობა ძალადობრივია. ჩემი ცხოვრების დაბრუნება მინდა", — განაცხადა ბრიტნიმ.

1-ლ ივლისს სასამართლოს მიერ მიღებული გადაწყვეტილების მიხედვით, ბრიტნის მეურვედ ისევ მამამისი რჩება, თუმცა აშკარაა, რომ მომღერალი დანებებას არ აპირებს.

ასევე იხილეთ: