ბრიტნი სპირსი ოფიციალურად შეუერთდა მოძრაობას, ჰეშთეგით #FreeBritney, რომელსაც პოპვარსკვლავის ფანები მისი მეურვეობისგან გათავისუფლების მოთხოვნით რამდენიმე წელია იყენებენ. მომღერალმა სწორედ ამ ჰეშთეგით აღნიშნა სასამართლოს გადაწყვეტილება, რომლის მიხედვითაც ბრიტნის ადვოკატის დაქირავება თავად შეუძლება.

"მადლობა ჩემს ფანებს, რომლებიც მხარს მიჭერენ... წარმოდგენა არ გაქვთ, რამხელა მნიშვნელობა აქვს თქვენნაირი საოცარი ფანების მხარდაჭერას!!!" — წერს ბრიტნი თავის ახალ ინსტაგრამპოსტში, რომელშიც ჰეშთეგს #FreeBritney პირველად იყენებს.

ბრიტნი სპირსი 2008 წლიდან ფსიქიკური ჯანმრთელობის გაუარესების გამო კანონიერი მეურვეობის ქვეშაა: ცამეტი წელი მის პირად ცხოვრებას, კარიერასა და ფინანსებს მამამისი განკარგავდა. ბოლო წლებში ბრიტნის ფანების მონდომებით ინტერნეტში შეიქმნა მოძრაობა #FreeBritney (თავისუფლება ბრიტნის), რომლის მხარდამჭერებიც ამბობდნენ, რომ ბრიტნი მკაცრი კონტროლის ქვეშ იყო და მისი თავისუფლება უსაფუძვლოდ იყო შეზღუდული.

სასამართლოზე მომღერალმა ეს მოსაზრებები დაადასტურა: მაგალითად, მისი თქმით, თურმე უკრძალავდნენ შვილის გაჩენას, წამლებით აბრუებდნენ და მამამისი სასამართლოს მიერ მინიჭებული მეურვის უფლებებს ბოროტად იყენებდა. "ეს მეურვეობა ძალადობრივია. ჩემი ცხოვრების დაბრუნება მინდა", — განაცხადა ბრიტნიმ.

1-ლ ივლისს სასამართლოს მიერ მიღებული გადაწყვეტილების მიხედვით, ბრიტნის მეურვედ ისევ მამამისი რჩება, თუმცა აშკარაა, რომ მომღერალი დანებებას არ აპირებს.

ამავე თემაზე: