ფოტო: Madonna / Instagram

პოპის დედოფალი პოპის პრინცესას მხარდაჭერას უცხადებს. მადონამ ინსტაგრამზე სთორი გამოაქვეყნა, რომელშიც ბრიტნი სპირსის 13-წლიანი მეურვეობის საქმე გააკრიტიკა და მას ადამიანის უფლებების დარღვევა უწოდა.

"დაუბრუნეთ ამ ქალს თავისი ცხოვრება, მონობა დიდი ხნის წინ დავასრულეთ! განადგურდეს ეს ხარბი პატრიარქატი, რომელიც ქალებს საუკუნეების განმავლობაში ასე ექცეოდა. ეს ადამიანის უფლებების დარღვევაა! ბრიტნი, მოვდივართ და მალე დაგიხსნით მაგ ციხიდან!" — წერს მადონა.

მომღერალი თავის ძველ ფოტოს აქვეყნებს, რომელშიც მაისურზე ბრიტნი სპირსი აწერია.

2003 წელს მომღერლებმა ერთად ჩაწერეს სიმღერა და კლიპი Me Against The Music.

ამავე წელს ისინი MTV VMAs-ის დაჯილდოებაზე გამოვიდნენ და კრისტინა აგილერასთან ერთად მადონას ჰიტი, Like A Virgin შეასრულეს. შესრულებას ახლდა მადონასა და ბრიტნის და აგილერას ცნობილი კოცნა.

ივნისის ბოლოს ბრიტნიმ სასამართლოზე გამოსვლისას მეურვეობა სექს-ტრეფიკინგს შეადარა. მისი თქმით ბედნიერი არაა და ყოველდღე ტირის, რადგან მის უფლებებს ზღუდავენ. მუსიკის ინდუსტრიაში ერთ-ერთმა ყველაზე გავლენიანმა შემსრულებელმა განაცხადა, რომ მას ქორწინების და შვილის გაჩენის უფლებას მეურვეები არ აძლევენ. ბრიტნიმ დასძინა, რომ ყველაფერი, რაც მის ცხოვრებაში ხდება, მამამისთანაა შეთანხმებული, რომელიც 13 წელია მისი მეურვეა. ბრიტნიმ დასძინა, რომ სურს თავის მთელ ოჯახს უჩივლოს:

"ისინი ციხეში უნდა იყვნენ, იმისთვის არ დავბადებულვარ, რომ ვინმეს მონა ვიყო".

ბრიტნის მეურვეები არამხოლოდ მის გადაწყვეტილებებს, მის ქონებასაც განაგებენ. მომღერალმა თითქმის 30-წუთიან გამოსვლაში მამამისს "იდიოტი" უწოდა და კალიფორნიის შტატი მეურვეებისთვის გადაჭარბებული უფლებების მინიჭების გამო გააკრიტიკა. სპირსმა დასძინა, რომ ადვოკატი აფრთხილებდა, რომ მის საჯაროდ ლაპარაკს შესაძლოა გართულებები და სამკურნალო დაწესებულებაში მისი გადაყვანა მოჰყოლოდა, თუმცა მომღერლის თქმით, გადაწყვიტა რომ მსოფლიოს საკუთარი ისტორია გულწრფელად მოუყვეს.

ბრიტნის ცხოვრებას მისი მეურვეები 2008 წლიდან აკონტროლებენ. ბრიტნის გამოსვლის შემდეგ გადადგა მისი მენეჯერი, ადვოკატი, ხოლო მომღერლის დამ განაცხადა, რომ ბრიტნის ყოველთვის მხარს უჭერდა.

ბრიტნის მეურვეობის შესახებ შემდეგი სასამართლო 14 ივლისს გაიმართება.