სენატორი ჯიმ რიშის განცხადებით, იმედგაცრუებულები არიან იმით, რაც საქართველოში ხდება. ამის შესახებ მან აშშ-ს სენატის საგარეო ურთიერთობის კომიტეტის სხდომაზე ისაუბრა და საქართველოს საკითხს რამდენჯერმე შეეხო.

"სულ უფრო მეტად ვღელავ საქართველოში უკან გადადგმული ნაბიჯების გამო. წინა კვირას 50-ზე მეტი ჟურნალისტს სცემეს და ერთ-ერთი გარდაიცვალა მისი დაზიანებების შედეგად. ასევე, რამდენიმე მოსამართლე აირჩიეს 19 აპრილის შეთანხმების საწინააღმდეგოდ. ვიმედოვნებ, რომ იმუშავებთ და საქართველოს მთავრობას ამ პრობლემების შესახებ მიმართავთ", — განაცხადა მან.

მისი თქმით, როცა 2012 წელს სენატორი შაჰინი საქართველოში იმყოფებოდნენ, იმედი ჰქონდათ, რომ ეს ახალი დასაწყისი ქვეყნისთვის იქნებოდა, თუმცა მას შემდეგ "რეგულარულად იემდგაცრუებულები" არიან. სენატორის განცხადებით, პარტიები მუდამ ჩადიან ვაშინგტონში და ცდილობენ, მათ მხარეები აარჩევინონ.

"ჩვენ ვეუბნებით, რომ ეს თავად უნდა მოაგვარონ. ჩვენ მხარეებს არ ავირჩევთ, მაგრამ ამ მხრივ დიდი პროგრესი არ აქვთ", — თქვა მან.

TV პირველის ოპერატორი, ალექსანდრე ლაშქარავა 11 ივლისს დედამ სახლში გარდაცვლილი იპოვა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.