თეოლოგი და ყოფილი სასულიერო პირი, ბასილ კობახიძე აცხადებს, რომ ეკლესიაში 1984 წელს მივიდა და იმის შემდეგ ერთხელაც არ ახსოვს სვეტიცხოველში წირვა რუსულ ენაზე. ამის შესახებ მან On.ge-ს განუცხადა. კობახიძე ამბობს, რომ სახელმწიფო და ეკლესია, რუსეთის დაკვეთით, მართლმადიდებლურ ფაშისტურ დიქტატურას ამყარებენ.

"1984 წელს მოვედი ეკლესიაში მე და რამდენი სტუმარი არ ყოფილა ჩამოსული, გნებავთ რუსეთიდან თუ უკრაინიდან, მაგრამ ერთხელაც არ მახსოვს და არც ყოფილა, რომ სვეტიცხოველში, სადაც ავტოკეფალია გამოაცხადეს ჩვენი ეკლესიის მამებმა მე-20 საუკუნის დასაწყისში, ისევ სლავურ ენაზე ყოფილიყოს წირვა. ეს არის ძალიან დიდი დარტყმა", — ამბობს ბასილ კობახიძე.

მისივე თქმით, საპატრიარქო პუტინის მესიჯებს 5 ივლისიდან აჟღერებს. კობახიძეს მაგალითად შიო მუჯირის განცხადება მოჰყავს, რომელმაც "რელიგიური გრძნობების შეურაცხყოფის" კანონით რეგულირება მოითხოვა.

"მან მოსთხოვა სახელმწიფოს, რა თქმა უნდა, წინასწარი შეთანხმებით სახელმწიფოსთანვე, რომ ასეთი კანონი მიიღონ და შემდეგ, ოპოზიციაც, ხელისუფლებაც და ეკლესიაც საუბრობს "ანტიეკლესიურ ძალებზე", საპატრიარქო საბჭოთა სტილის პროპაგანდისტულ ვიდეოებს აქვეყნებს სხვადასხვა ოპოზიციური პოლიტიკოსების გამონათქვამებისგან პატრიარქის კრიტიკით, რომ ეს არის დაუფარავი შეურაცხყოფა ეკლესიის, მაშინ, როცა ეკლესიის დაუფარავი შეურაცხყოფა სწორედ სვეტიცხოველში აღვლენილი სლავური წირვაა", — ამბობს ბასილ კობახიძე.

დღეს, 16 ივლისს Facekoob-ზე გავრცელდა ვიდეო, სადაც აღბეჭდილია, რომ სვეტიცხოველში წირვა რუსულ ენაზე აღევლინა. ამასთან დაკავშირებით საქართველოს საპატრიარქოს საზოგადოებასთან ურთიერთობის სამსახური აცხადებს, რუომ კრაინიდან საქართველოში მოსალოცად ჩამოსული სასულიერო პირთა ჯგუფმა ითხოვა სვეტიცხოველში მსახურების ნებართვა.

"დღეს ქართველ მღვდელმსახურებთან ერთად ქართულ და საეკლესიო სლავურ ენებზე ერთობლივი მსახურება აღევლინა. მოგეხსენებათ, უკრაინაში, ღვთისმსახურება საეკლესიო სლავურ ენაზე აღევლინება. ზოგადად, ეკლესიაში მიღებული პრაქტიკაა, სტუმრებს მსახურების ნაწილის მშობლიურ ენაზე შესრულების საშუალება მიეცეს", — აცხადებენ საპატრიარქოში.