საზოგადოებივი მაუწყებლის მენეჯმენტის ახალი სამოქმედო გეგმის მიხედვით, პირველ არხზე 17 ივლისიდან, "მოამბის" გარდა, ყველა გადაცემა დაიხურება. როგორც დოკუმენტში წერია, ეთერში 2017 წლის სექტემბრიდან დაბრუნდება პროგრამული პრიორიტეტების შესაბამისად, კონკურსის წესით შერჩეული ახალი გადაცემები. კონკურსი ახალი გადაცემების შესარჩევად, მარტიდან უკვე გამოცხადდება. აღნიშნულ გეგმას მაუწყებლის გენერალურმა დირექტორმა, ვასილ მაღლაფერიძემ დღეს, სამეურვეო საბჭოს სხდომაზე მოაწერა ხელი. სამეურვეო საბჭომ დოკუმენტი ცნობად მიიღო. მის დასამტკიცებლად საბჭოს კენჭისყრა საჭირო არ ყოფილა.

„საზოგადოებრივი მაუწყებლის ეთერში ახალ სეზონზე განთავსდება გადაცემების ოპტიმალური რაოდენობა, ფინანსური და ტექნიკური რესურსიდან გამომდინარე,“ - ვკითხულობთ მაუწყებლის მენეჯმენტის გეგმაში, სადაც არ არის დაკონკრეტებული, რა თანხის გამოყოფა იგეგმება გადაცემებზე.

საზოგადოებრივი მაუწყებლის მედიისა და კომუნიკაციის ბლოკის დირექტორმა, თიკო ბერძენიშვილმა გეგმის პრეზენტაციის დროს თქვა, რომ ახალი სეზონიდან შიდა წარმოების პროდუქტის ხარჯი დაითვლება, ისე, როგორც მაუწყებლის გარეთ დამზადებული პროექტები.
მაუწყებლის მენეჯმენტის გეგმის მიხედვით, პროდუქციის მინიმუმ 25 პროცენტი გარე წარმოების შედეგად იქნება მოზიდული.

არხის მენეჯმენტი გეგმავს, რომ გარე წარმოების ხელშეწყობის მიზნით კონკურსში მონაწილე პირებს შესთავაზონ საპილოტე გადაცემის მაუწყებლის ბაზაზე დამზადება.

გეგმის მიხედვით, ცვლილებები ეხება მეორე არხსაც, სადაც იგეგმება ყველა გადაცემის შეჩერება საპარლამენტო სხდომების ტრანსლირების გარდა. 2018 წლის იანვრიდან კი მეორე არხის ხედვა ჩამოყალიბდება.

მენეჯმენტის გადაწყვეტილებით, მეორე არხზე არსებულ გადაცემებზე დასაქმებული ადამიანების ნაწილი პირველი არხის საზოგადოებრივ-პოლიტიკურ პროგრამებზე გადანაწილდებიან.

საზოგადოებრივ მაუწყებელს ეკუთვნის რადიო ერთიც. მაუწყებლის სამოქმედო გეგმაში რადიოს ერთი წინადადება ეთმობა:

"2017 წლის 1 ივნისამდე დასრულდება საზოგადოებრივი რადიოს ეთერის პროგრამული პრიორიტეტების შემუშავება, რომელიც უზრუნველყოფს ამ დროისთვის არსებული ხარისხიანი პროდუქტების შენარჩუნებას და რადიოს პოპულარიზაციას".

საზოგადოებრივი მაუწყებლის მენეჯმენტი აღნიშნულ გეგმამდე მანამდე არსებული რამდენიმე გეგმის შემდეგ მივიდა. საწყის ეტაპზე მენეჯმენტი მიიჩნევდა, რომ საზოგადოებრივ მაუწყებელზე ყველა გადაცემა უნდა დახურულიყო საინფორმაციო გამოშვების გარდა. მეორე გეგმა, რომელიც მენეჯმენტმა სამეურვეო საბჭოს წევრებს შესთავაზა გადაცემების სამ ნაწილად დაყოფას ითვალისწინებდა. აღნიშნულის მიხედვით, გადაცემები, რომელთა რეიტინგიც მაუწყებლის საშუალო რეიტინგზე დაბალი იყო, უნდა დახურულიყო. ამ გადაცემების ჩამონათვალში ხვდებოდნენ გადაცემები რეალური სივრცე და წითელი ზონა.

იხილეთ საზოგადოებრივი მაუწყებლის სამოქმედო გეგმა.