პრემიერმინისტრმა, ირაკლი ღარიბაშილმა მთავრობის სხდომის დაწყებამდე გადაწყვიტა შეეფასებინა ბოლო დღეებში განვითარებული მოვლენები.

"ჩემი შეფასება, ზოგადად, ამ დღეების განმავლობაში, როგორ განვითარდა მოვლენები: ეს არის მორიგი წარუმატებელი შეთქმულება სახელმწიფოს წინააღმდეგ. ანტისახელმწიფოებრივი და ანტიეკლესიური ძალების მიერ დაგეგმილი შეთქმულება ვერ შედგა და ვერასოდეს ვერ შედგება ჩვენს ქვეყანაში", — განაცხადა ღარიბაშვილმა.

პრემიერმინისტრის მტკიცებით, 5 ივლისს, ძალადობრივ კონტრაქციაზე სასტიკად ნაცემი ჟურნალისტის, ლექსო ლაშქარავას გარდაცვალება სცადეს გამოეყენებინათ პოლიტიკური მიზნებისთვის.

"ეს ტრაგედია, ჩვენ ვნახეთ ყველამ, რომ სცადეს გამოეყენებინათ, ამ ადამიანის ტრაგედია, საკუთარი პოლიტიკური მიზნების მისაღწევად. რა შეიძლება იყოს იმაზე ამორალური, როცა გარდაცვლილი ადამიანის ტრაგედიით ცდილობს საკუთარი პოლიტიკური მიზნების მიღწევას?!", — განაცხადა ღარიბაშვილმა.

11 ივლისს გარდაიცვალა TV პირველის ოპერატორი, ალექსანდრე ლაშქარავა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და შემდეგ სახლში გაეწერა.

ლექსო ლაშქარავას გარდაცვალებაზე ოთხმა ტელევიზიამ — TV პირველმა, ფორმულამ, მთავარმა არხმა და კავკასიამ — პასუხისმგებლობა მთავრობას დააკისრა და მოსახლეობას პარლამენტის წინ შეკრებისკენ მოუწოდა.

აქციაზე, სადაც ტრიბუნასთან ლექსო ლაშქარავას კოლეგები — სხვადასხვა მედიის ჟურნალისტები — იდგნენ, ღარიბაშვილის მოითხოვეს მთავრობის გადადგომა. მოთხოვნას შეუერთდნენ როგორც ოპოზიციური პარტიები, ისე არასამთავრობო ორგანიზაციები. მოთხოვნის შესასრულებლად მათ მთავრობას დრო 12 ივლისის 12:00 საათამდე მისცეს. 11:00 საათზე ღარიბაშვილმა ბრიფინგი გამართა, თუმცა გადადგომის ნაცვლად ამ მოთხოვნის "პოლიტიკურ სარჩულზე" ისაუბრა.

ლაშქარავას გარდაცვალების შემდეგ 70-ზე მეტმა მედიაორგანიზაციამ ერთობლივი წერილით მიმართა დიპლომატიურ კორპუსს და 5 ივლისს მედიის წარმომადგენლების მიზანმიმართულ დევნაზე, ჯანმრთელობის დაზიანების, პროფესიულ მოვალეობაში ხელშეშლის ფაქტებსა და საქართველოს ხელისუფლების უმოქმედობაზე მყისიერი და ეფექტიანი რეაგირება მოითხოვა.

გაიგე მეტი: