რუსთაველის გამზირზე, პარლამენტთან აქციაზე ადამიანები დაშავდნენ. ადგილზე მყოფი On.ge-ს ჟურნალისტის ინფორმაციით, ფეხში ქვა აქციის ერთ-ერთ მონაწილე ქალს მოხვდა. ის სასწრაფო სამედიცინო სამსახურის მანქანაში შეიყვანეს, სადაც შესაბამისი პროცედურა უტარდება.

დაუზუსტებელი ინფორმაიცით, აქციაზე დაშავდა, ასევე, პოლიციელიც.

ამ წუთებში პარლამენტთან ორი აქცია მიმდინარეობს. მდუმარე აქციის, სახელწოდებით #თავისუფლებისთვის, მონაწილეები 5 ივლისს ჟურნალისტებზე განხორციელებულ ძალადობას აპროტესტებენ. აღნიშნულ აქციას შეუერთდა თბილისი პრაიდიც.

პარალელურად ჰომოფობიური და ძალადობრივი ჯგუფის წევრები ქაშუეთთან არიან შეკრებილები და სავარაუდოდ, პიროტექნიკას ისვრიან. ისინი მდუმარე აქციის მონაწილეებს, ასევე, ემუქრებიან და სიტყვიერ შეურაცხყოფას აყენებენ. ძალადობრივმა ჯგუფებმა პოლიციას, სავარაუდოდ, წიწაკის სპრეიც შეასხეს.