ბრიტნი სპირსის მენეჯერმა, ლარი რუდოლფმა, რომელიც მომღერალთან 1990-იანი წლების შემდეგ მუშაობდა, თანამდებობა დატოვა და განაცხადა, რომ მომღერალმა, შესაძლოა, საკუთარი კარიერა დაასრულოს.

ბრიტნის მეურვეებისათვის, ჯეიმს სპირსისა და ჯოდი მონტგომერისათვის, გაგზავნილ წერილში, რუდოლფი წერს:

"ორწელიწადნახევარი გავიდა, რაც მე და ბრიტნიმ ვილაპარაკეთ და მან მითხრა, რომ განუსაზღვრელი დროით სურდა შემოქმედებითი პაუზის აღება. სულ ცოტა ხნის წინ კი შევიტყვე, რომ ბრიტნიმ საკუთარი კარიერის დასრულების სურვილი გააჟღერა.

"როგორც იცით, მე არც მეურვეობის ნაწილი არ ვყოფილვარ არასდროს და არც მის საქმეებში ჩავრეულვარ. შესაბამისად, დეტალებზე საუბარი ჩემი პრეროგატივა არაა. ბრიტნის მენეჯერი მე მისივე თხოვნით გავხდი, რათა კარიერის მართვაში დავხმარებოდი. როგორც მის მენეჯერს, მიმაჩნია, რომ ბრიტნისთვის საუკეთესო გადაწყვეტილებაა, რომ მისი გუნდი ახლა დავტოვო, რადგან ჩემი პროფესიული საჭიროება აღარ არსებობს".

წერილის დასასრულს რუდოლფმა დასძინა, რომ ბრიტნის "ჯანმრთელობასა და ბედნიერებას უსურვებს".

ეს გადაწყვეტილება ამერიკელი პოპვარსკვლავის გარშემო არსებულ ხმაურს მოჰყვა. ბრიტნი 2008 წლის შემდეგ სასამართლოს მიერ განსაზღვრული მეურვეობის ქვეშ იმყოფება, რის გამოც მამამისი მის ქონებასა და კარიერას უკვე წლებია, განკარგავს.

სპირსმა მეურვეობის შეწყვეტის მოთხოვნით ლოს-ანჯელესის სასამართლოს ივნისის თვეშიც მიმართა და განაცხადა, რომ მამისა და სხვა მეურვის ხელში თავს "დამონებულად" გრძნობს. მომღერალმა ისიც აღნიშნა, რომ მამამისისგან "ტრავმირებულია" და მან ცუდი გავლენა იქონია მის მენტალურ ჯანმრთელობაზე. პოპვარსკვლავმა ასევე ფანებს ბოდიში მოუხადა, "რომ ატყუებდა, თითქოს კარგად იყო". ამასთან, დასძინა, რომ "ბედნიერი არაა; ტრავმირებული და განრისხებულია".

მიუხედავად ბრიტნის მრავალწლიანი მოთხოვნისა და უამრავი ადამიანის მხარდაჭერისა, სასამართლომ მომღერალი მეურვეობისგან არც ამჯერად გაათავისუფლა.

თუკი ბრიტნი კარიერას თავს დაანებებს, ამით ერთ-ერთი ყველაზე წარმატებული ამერიკელი პოპვარსკვლავის მოღვაწეობა დასრულდება. ბრიტნის ცხრიდან ექვსი ალბომი აშშ-ში ჩარტების ლიდერი იყო, მისი სიმღერები კი — ...Baby One More Time, Oops! … I Did It Again და Toxic — საუკუნის მსოფლიო ჰიტებად და თანამედროვე პოპმუსიკის განმსაზღვრელ ნამუშევრებად იქცა. მომღერლის ამ დროისთვის ბოლო სტუდიური ალბომი, Glory, 2016 წელს გამოვიდა.