ქართული ოცნების დეპუტატი, შალვა პაპუაშვილი არასამთავრობოთა ნაწილს მიმართავს და აცხადებს, რომ ნუ დაემსგავსებიან ადამიანს, რომელიც "მშობლებს დახოცავს და შემდეგ შეწყალებას სთხოვს მოსამართლეს, იმიტომ, რომ ობოლია". ასე შეაფასა მან NGO-ების განცხადება, რომლის მიხედვითაც მათი ნაწილი უზენაესი სასამართლოს მოსამართლეობის კანდიდატებთან გასაუბრებებში მონაწილეობას არ მიიღებს.

"რაც შეეხება ზოგიერთ არასამთავრობო ორგანიზაციას, ვნახე განცხადება იყო, რომ ისინი არ მიიღებენ მონაწილეობას, ერთ რამეს ვეტყვი მათ — ნუ დაემსგავსებიან ადამიანს, რომელიც საკუთარ მშობლებს დახოცავს და შემდეგ მოსამართლეს შეწყალებას სთხოვს, იმიტომ, რომ ობოლია. დღეს ისინი თუ აქ არ დასეწრებიან, შემდეგ ნუ იტყვიან, რომ პროცესი არ იყო ინკლუზიური", — თქვა მან.

პარლამენტში უზენაესი სასამართლოს მოსამართლეობის კანდიდატებს 6 ივლისიდან მოუსმენენ. ეს გადაწყვეტილება იურიდიულ საკითხთა კომიტეტზე მიიღეს. როგორც კომიტეტის თავმჯდომარემ, ანრი ოხანაშვილმა განაცხადა, გასაუბრებები სამშაბათს, დილის 10 საათიდან დაიწყება.

არასამთავრობო ორგანიზაციათა ნაწილი, ოპოზიცია და ასევე, სახალხო დამცველი ამ პროცესში მონაწილეობაზე უარს აცხადებენ.