სოციალურ ქსელში გავრცელებულ ვიდეოსთან დაკავშირებით, სადაც ჩანს, რომ რამდენიმე პიროვნება დიდი რაოდენობით პოლიეთილენის ბოთლებს ყრის მდინარეში, საქმისაწარმოება დაწყებულია. აღნიშნული ინფორმაცია On.ge-ს გარემოსდაცვითი ზედამხედველობის დეპარტამენტში დაუდასტურეს.

ვიდეოში ჩანს, რომ რამდენიმე ადამიანი ქართული სანომრო ნიშნიანი ავტომობილით დიდი რაოდენობით პოლიეთილენის ბოთლებს მდინარეში ყრის და გარემოს მიზანმიმართულად აბინძურებს.

გარემოსდაცვითი ზედამხედველობის დეპარტამენტის ინფორმაციით, საქმის წარმოება საქართველოს ადმინისტრაციულ სამართალდარღვევათა კოდექსის 58-ე, ნარჩენების მართვის კოდექსის 31-ე და 40-ე მუხლით გათვალისწინებულ სამართალდარღვევაზე დაიწყო.

მათივე ცნობით, აღნიშნული სამართალდარღვევა ქვემო ქართლში მოხდა, კერძოდ ბოლნისის მუნიციპალიტეტში, ამას გარდა დადგენილია სამართალდამრღვევის ვინაობა.