"იმბეცილი ხარ თავიდან ბოლომდე", "კორექტულობა გმართებს", — ეს სიტყვები წალკის მუნიციპალიტეტის ფეისბუქგვერდმა ერთ-ერთი მომხმარებელს პოსტის კომენტარებში დაუწერა.

25 ივნისს ფეისბუქის მომხმარებელმა, კონსტანტინე გაბულდანმა მთავარი არხის სიუჟეტი გააზიარა, რომელშიც ნათქვამი იყო, რომ წალკის მუნიციპალიტეტი მამა-შვილი ბაღაშვილების კონცერტისთვის 15 ათას ლარს დახარჯავს. პოსტში გაბულდანს მუნიციპალიტეტის ფეისბუქგვერდი აქვს მონიშნული და მათ "იმბეცილებს" უწოდებს.

სწორედ ამ პოსტის ქვეშ დაიწერა წალკის მუნიციპალიტეტის კომენტარი, სადაც მოქალაქეს არაკორექტულად მიმართავდნენ და საპასუხოდ "იმბეცილი" უწოდეს.

ამასთან დაკავშირებით On.ge წალკის მუნიციპალიტეტს დაუკავშირდა. ადმინისტრაციული სამსახურის უფროსის, ევგენია ფურცელაძის თქმით, მსგავსი შემთხვევა აქამდე არ ჰქონიათ და ადმინისტრატორს გაფრთხილებას მისცემენ. თუმცა ის აღნიშნავს, რომ მსგავსი მიმართვის უფლება არც მოქალაქეს აქვს.

"არ უნდა დაეწერათ, უბრალოდ, ეტყობა, არ ესიამოვნათ. ახალგაზრდა ბიჭი ჩვენი მოქალაქეა, ჩვენ ახლა აქ უფროსი ხალხი ვართ, ასაკით და თანამდებობით და რაღაცას ვაკეთებთ... ასე არ უნდა მოგვმართოს, არც მოქალაქეს აქვს უფლება. ვამოწმებ კომენტარებს და ვცდილობთ, რომ ზრდილობიანი კომენტარები იყოს [...] ვუთხარით, რომ ეს სიტყვა არ უნდა დაგვეწერა, მაგრამ უშეცდომო არავინაა. მე მგონია, რომ ისეთ დიდი ტრაგედია არ მოხდა", — ამბობს მუნიციპალიტეტის თანამშრომელი.

მოგვიანებით, ევგენია ფურცელაძე On.ge-ს თვითონ დაუკავშირდა. მისი განმარტებით, კომენტარი მუნიციპალიტეტის სახელით უყურადღებობის გამო დაიწერა.

"პირადად როგორც მოქალაქეებმა ისე დაწერეს ეს კომენტარი, მაგრამ ეტყობა, იმ საიტიდან იყვნენ შესულები და იმიტომ დაიწერა წალკის მუნიციპალიტეტის მერია, თორემ მე ვაკონტროლებ, რომ მერიის სახელით ასეთი არაფერი დაიწეროს", — თქვა ფურცელაძემ.

აღნიშნული პოსტი და კომენტარები ამ დრომდე [11:38] იძებნება.