მოსახლეობაში გამოჩენის კუთხით ქვეწარმავლების აქტიურობა პიკს ამ პერიოდში აღწევს. ცხოველთა მონიტორინგის სააგენტოს ჰერპეტოლოგი, შოთა ზანდუკელი გვირჩევს, როგორ შეიძლება მათგან თავის დაცვა და რა რას ვაკეთებთ კბენის შემთხვევაში. კვირას პრესკლუბში გამართულ პრესკონფერენციაზე ზანდუკელმა თქვა, რომ ტრიალ მინდორზე, შუადღისას, ნებისმიერ გველთან შეხვედრის ალბათობა 1%-ია. მისივე თქმით, შეიძლება არც კი იყოს ერთი პროცენტი, რადგან ამ დროს ქვეწარმავალი ვერ აქტიურობს.

"პაპანაქება სიცხეში მისი სხეული იწვება და კვდება. თუმცა დილის, საღამოს ან ღამის საათებში, როდესაც, ვთქვათ, გიურზას აქტივობა არის ძალიან მაღალი, ამ შემთხვევაში უნდა გავითვალისწინოთ, რომ იმ არეალში, სადაც გიურზის შეხვედრის ალბათობა გვაქვს დიდი, ჯოხი გვეჭიროს. მილიონში ერთი შეხვედრა ხდება, როდესაც ჩვენ ვადგამთ ფეხს. ძირითადად, ყველა ქვეწარმავალი, მათ შორის გიურზა გარბის ჩვენგან, როდესაც ჩვენ მისი მიმართულებით მივდივართ", — აღნიშნავს ზანდუკელი.

ჰერპეტოლოგის რჩევით, იმ შემთხვევაში, თუ ადამიანმა გველს ფეხი დაადგა და ქვეწარმავალმა ის დაკბინა, პირველ რიგში, 112-ში უნდა დარეკოს და ნაკლები იმოძრაოს.

"სანამ სასწრაფო მოვა უნდა მივიღოთ რაც შეიძლება მეტი სითხე, არა ალკოჰოლური. ალკოჰოლის მიღება არცერთ შემთხვევაში არ შეიძლება. არ შეიძლება ამოწვა, ამოწოვა, ლახტის დადება. ელასტიური ბენტის ოდნავ გადახვევა შეგვიძლია, რათა სისხლის მიმოქცევა ოდნავ შევაჩეროთ, თუმცა იმ დონეზე არ შეიძლება გადაჭერა, რომ სისხლი გაჩერდეს", — ამბობს შოთა ზანდუკელი.

მისივე თქმით, ეზოში ქვეწარმავლებს კომფორტული გარემო არ უნდა შევუქმნათ. საუბარია მაღალ ბალახზე, მოუვლელი ბუჩქნარსა და სამშენებლო ნარჩენებზე.

შოთა ზანდუკელის განცხადებით, გიურზების მომრავლებასთან დაკავშირებით გავრცელებული ინფორმაცია სიმართლეს არ შეესაბამება და მთლიანობაში სურათი შეცვლილი არ არის. როგორც ის აღნიშნავს, მონიტორინგის სააგენტოში გველების თაობაზე 500-მდე შეტყობინება შევიდა, რაც ამ პერიოდში წინა წლებთან მიმართებით სრულიად იდენტურია.

"ის გველგესლები, რომლებიც საქართველოს ტერიტორიაზე ბინადრობენ, ადამიანის სიცოცხლისთვის საფრთხისშემცველი არცერთი მათგანის შხამი არ არის. მათი შხამის მოქმედების სიძლიერე არის ძალიან სუსტი, რომელიც მაქსიმუმ გულის რევის შეგრძნებას, სიცხის მომატებასა და ლოკლაურ ტკივილებს იწვევს რაღაც პერიოდის განმავლობაში. მეტ არაფერს, თუ, რა თქმა უნდა, ადამიანი ჯანმრთელია და არ აქვს ჯანმრთელობის ძალიან სერიოზული პრობლემები, ან ბავშვი ძალიან პატარა არ არის, ან ადამიანს ალერგია არ აქვს კონკრეტულ შხამზე", — ამბობს ჰერპეტოლოგი.

რაც შეეხება გიურზას, ზანდუკელის თქმით, გიურზას გავრცელების არეალი სამხრეთ-აღმოსავლეთ საქართველოა, მოიაზრება თბილისის სამხრეთი ნაწილიც. მან, ასევე, აღნიშნა, რომ გველები ქალაქში არ ცხოვრობენ, არამედ იმ ბუნებრივ ნაწილში, რომელიც თბილისს ესაზღვრება.

ამის გამო კი ხდება შემთხვევები, როდესაც აღნიშნული ქვეწარმავალი ისეთ სივრცეებში ხვდება, სადაც ადამიანები ცხოვრობენ. თუმცა, ზანდუკელის თქმით, ეს არის ძალიან მცირე შემთხვევები. როგორც ის აღნიშნავს, წელიწადში ქალაქში გიურზას მოხვედრის წელიწადში, დაახლოებით, 3-დან 10 შემთხვევამდეა დაფიქსირებული.