ბრიტნი სპირსის უმცროსმა დამ, ჯემი ლინ სპირსმა მომღერალს მხარდაჭერა საჯაროდ გამოუცხადა. მეურვეობის დასრულების მოთხოვნით ბრიტნიმ სასამართლოს გასულ კვირაში მიმართა და განაცხადა, რომ მისი უფლებები იზღუდება.

ჯემი ლინ სპირსს ბრიტნის ფანების სიჩუმის გამო აკრიტიკებდნენ, ლინმა სწორედ მათ უპასუხა.

"სწორი არ ვიქნებოდი, თუ ჩემი დის სიტყვებს მის ნაცვლად ვიტყოდი. ეს მისი გასაკეთებელი იყო. ახლა, როცა მან ყველაფერი აშკარად თქვა, შემიძლია მეც ასევე მოვიქცე. მგონი აშკარაა, რომ დაბადებიდან ჩემი დის სიყვარულისა და მხარდაჭერის მეტი არაფერი გამიკეთებია. არ აქვს ჩემთვის მნიშვნელობა რას იზამს, ჯუნგლებში გაიქცევა თუ მსოფლიოს შეაზანზარებს, ჩემთვის მნიშვნელოვანი მხოლოდ მისი ბედნიერებაა", — თქვა მან ინსტაგრამის სთორიში განთავსებულ ვიდეოში.

სუპერვარსკვლავის 30 წლის და ამბობს, რომ მან ცხოვრებაში გააზრებული არჩევანი გააკეთა, რომ მის ცხოვრებაში მხოლოდ როგორც და და მისი შვილების დეიდა, ისე ჩართულიყო:

"შეიძლება მას ისე საჯაროდ არ ვგულშემატკივრობ, როგორც თქვენ გსურთ, ჰეშთეგით და საჯარო პლატფორმაზე. მაგრამ მე ჩემს დას იქამდე ვუჭერდი მხარს, სანამ ეგ ჰეშთეგი (#FreeBritney - თავისუფლება ბრიტნის) იარსებებდა და მომავალშიც ასე იქნება. კარგად დაიმახსოვრეთ. 9 წლიდან ვმუშაობ და საკუთარ თავს 10 წლიდან ვარჩენ. თქვენთან ვალდებული არ ვარ, ჩემმა დამ იცის, რომ მიყვარს და მის გვერდით ვარ და მე მხოლოდ მის მიმართ ვგრძნობ ვალდებულებას. მე ჩემი ოჯახი არ ვარ, მე პიროვნება ვარ და ჩემი სახელით ვლაპარაკობ. ჩემი დით ვამაყობ, რომ საკუთარ თავს იცავს და ლაპარაკობს, ვამაყობ, რომ ახალი ადვოკატი მოითხოვა".

ჯემი ლინ სპირსი, რომელიც თავად მსახიობია, ამბობს, რომ თავისი დის მოთხოვნას, მეურვეობის დასრულების შესახებ, მხარს უჭერს.

ბრიტნიმ სასამართლოზე გამოსვლისას მეურვეობა სექს-ტრეფიკინგს შეადარა. მისი თქმით ბედნიერი არაა და ყოველდღე ტირის, რადგან მის უფლებებს ზღუდავენ. მუსიკის ინდუსტრიაში ერთ-ერთმა ყველაზე გავლენიანმა შემსრულებელმა განაცხადა, რომ მას ქორწინების და შვილის გაჩენის უფლებას მეურვეები არ აძლევენ. ბრიტნიმ დასძინა, რომ ყველაფერი, რაც მის ცხოვრებაში ხდება, მამამისთანაა შეთანხმებული, რომელიც 13 წელია მისი მეურვეა. ბრიტნიმ დასძინა, რომ სურს თავის მთელ ოჯახს უჩივლოს:

"ისინი ციხეში უნდა იყვნენ, იმისთვის არ დავბადებულვარ, რომ ვინმეს მონა ვიყო".

ბრიტნის მეურვეები არამხოლოდ მის გადაწყვეტილებებს, მის ქონებასაც განაგებენ. მომღერალმა თითქმის 30-წუთიან გამოსვლაში მამამისს "იდიოტი" უწოდა და კალიფორნიის შტატი მეურვეებისთვის გადაჭარბებული უფლებების მინიჭების გამო გააკრიტიკა. სპირსმა დასძინა, რომ ადვოკატი აფრთხილებდა, რომ მის საჯაროდ ლაპარაკს შესაძლოა გართულებები და სამკურნალო დაწესებულებაში მისი გადაყვანა შესაძლოა მოჰყოლოდა, თუმცა მომღერლის თქმით, გადაწყვიტა რომ მსოფლიოს საკუთარი ისტორია გულწრფელად მოუყვეს.

ამავე თემაზე:

• არ ვარ ბედნიერი, ტრავმირებული და განრისხებული ვარ — ბრიტნი სასამართლოზე სიტყვით გამოვიდა;
• მას შემდეგ რაც მოვისმინეთ, ყველა ბრიტნის გვერდით უნდა ვიყოთ — ჯასტინ ტიმბერლეიკი;
• ბოდიში, რომ გატყუებდით, თითქოს კარგად ვიყავი — ბრიტნი სასამართლოს შემდეგ.