პრემიერმინისტრმა, ირაკლი ღარიბაშვილმა არ უპასუხა ნაციონალური მოძრაობის წევრის, ლევან ხაბეიშვილის რეპლიკას მისი ძვირადღირებული საათის შესახებ და განაცხადა, რომ ხაბეიშვილი "გავიდა კონტროლიდან". მისი თქმით, "მდარე ხარისხის კითხვები" საზოგადოებისთვის საინტერესო არ არის.

"ბატონო ლევან, თქვენ საერთოდ გახვედით კონტროლიდან. 2013-2014 წლებში კარგი ბიჭი იყო და ახლა რა მოუვიდა არ ვიცი რა საერთოდ. კარგი ბიჭი იყავით მაშინ, კაცო. თქვენ მიხვდებით სადაც გნახეთ.

რა გიპასუხოთ არ ვიცი მე, გარდა იმისა, რომ საერთოდ გახვედით კონტროლიდან. არაფერი, ლევან, არაფერი. გარდა იმისა, რომ ეს იაფფასიანი, მდარე ხარისხის კითხვები არ არის საინტერესო საზოგადოებისთვის", — განაცხადა მან და დაამატა, "ჩემი ნათქვამი ტყუილია? რომ გახვედით კონტროლიდან".

პარლამენტში პრემიერმინისტრის ანგარიშის წარდგენის შემდეგ ნაციონალური მოძრაობის ლიდერმა, ლევან ხაბეიშვილმა ირაკლი ღარიბაშვილს კონკრეტული ციფრები წარუდგინა, რომელიც ქვეყანაში სოციალურად დაუცველების კვებისთვის განკუთვნილ თანხას, საშუალო ხელფასს, საარსებობ მინიმუმს და სხვა მსგავს საკითხებს ეხებოდა. მანვე აღნიშნა, რომ პრემიერს 6 665 ადამიანის თვიური საარსებო მინიმუმი მაჯაზე ჰკიდია, რადგან მისი საათი 300 000 ლარი ღირს.

პრემიერის მაჯის საათებზე რამდენიმე თვის წინ რადიო თავისუფლებამ ჟურნალისტური გამოძიება გამოაქვეყნა. სადაც აღნიშნული იყო, რომ ღარიბაშვილის მაჯის საათების ჯამური ფასი, სავარაუდოდ, ნახევარ მილიონ ლარს აჭარბებს. მათივე ინფორმაციით, საათების ნაწილი პრემიერს დეკლარირებული არ ჰქონდა.

გარდა ამისა, გამოცემა აღნიშნავდა, რომ ჟურნალისტური გამოძიების ჩატარების მომენტისთვის, ღარიბაშვილს სულ ხუთჯერ ჰქონდა შევსებული ქონებრივი დეკლარაცია და 2012 წლიდან ჯამში 459 ათასი ლარის შემოსავალი ჰქონდა, მაშინ, როცა მისსავე ფოტოებში ასახული საათების ჯამური ღირებულება სულ მცირე 550 ათასი ლარი იყო.