ჯანდაცვის მინისტრის, ეკატერინე ტიკარაძის განცხადებით, იმისთვის, რომ დაიწყოს საუბარი იმაზე, უნდა დადგეს თუ არა რომელიმე უწყების პასუხისმგებლობის საკითხი ვაქცინების დეფიციტთან დაკავშირებით, უნდა დაელოდონ აუდიტის დასკვნას.

"აუდიტის სამსახურის ვალდებულება არის დეტალურად შეისწავლოს სამინისტროსი და ასევე, სამინისტროს ქვეშ დაქვემდებარებული ყველა სსიპ-ის საქმიანობა, ეს ჩვენ გვაქვს როგორც გეგმიურ პროცესად, ასევე საჭიროების შემთხვევაში და ამ შემთხვევაში აუდიტის სამსახური გააგრძელებს დეტალურ მოკვლევას. იმისათვის, რომ ჩვენ ვისაუბროთ უნდა დადგეს თუ არა, ამა თუ იმ უწყების პასუხისმგებლობის საკითხი, მნიშვნელოვანი არის, რომ დაველოდოთ დასკვნას, ვინაიდან ამ ეტაპისთვის ჩვენ არ გაგვაჩნია საკმარისი ინფორმაცია იმისთვის, რომ ვისაუბროთ გარკვეული პასუხისმგებლობის დადგომაზე", — ამბობს ტიკარაძე.

21 ივნისს რესპუბლიკურ, ინფექციურ საავადმყოფოებში და ხეჩინაშვილის სახელობის კლინიკაში ასტრაზენეკას ვაქცინასთან დაკავშირებით ლოჯისტიკური პრობლემები შეიქმნა. დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა, რომ ყველა იმ მოქალაქეს, რომელსაც დაგეგმილი ჰქონდა აცრა ასტრაზენეკას ვაქცინით, უახლოეს პერიოდში შეეძლებათ აცრა.