დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

პრემიერმინისტრის, ირაკლი ღარიბაშვილის განცხადებით, კოვიდრეგულაციების დარღვევის გამო დაწესებული გადაუხდელი ჯარიმები გაუქმდება. ღარიბაშვილის თქმით, საუბარია იზოლაციის, კარანტინის და პირბადის ტარების წესის დარღვევის გამო დაკისრებულ დაახლოებით 76 მლნ ლარის გადაუხდელ ჯარიმებზე.

"აღნიშნული ინიციატივის ფარგლებში ამნისტია შეეხება და როგორც სისხლისსამართლებრივი სახდელისგან, ასევე, ადმინისტრაციული სახდელისგან გათავისუფლდება, დაახლოებით, 245 000-ზე მეტი ჩვენი თანამოქალაქე და 344 იურიდიული პირი", — განაცხადა ღარიბაშვილმა.

მისი თქმით, ეს გადაწყვეტილება პანდემიით გამოწვეული მძიმე სოციალურ-ეკონომიკური მდგომარეობის გათვალისწინებით მიიღეს.

"რა თქმა უნდა, ჩვენ გვესმის, რომ ვირუსის მართვის დროს აუცილებელი იყო და არის რეგულაციების დაცვა, თუმცა ასევე, ძალიან მნიშვნელოვანია პირველ რიგში ჩვენი მოქალაქეების ეკონომიკური მდგომარეობის შემსუბუქება და ეს ინიციატივა სწორედ ამით არის განპირობებული", — აღნიშნა მან.

ბოლოს, ღარიბაშვილმა მადლობა გადაუხადა პარლამენტს, აღნიშნა, რომ უმრავლესობასთან უკვე ჰქონდათ კომუნიკაცია და ამ ინიციატივას უმოკლეს დროში დაამტკიცებენ.