საქართველოს ეროვნული ბანკი ელოდება, რომ ივნისში წლიური ინფლაცია პიკს მიაღწევს — ამის შესახებ სებ-ის მიერ გავრცელებულ იმ რელიზშია ნათქვამი, რომელიც მონეტარული პოლიტიკის განაკვეთის უცვლელად, 9,5%-ზე დატოვებას ეხება.

ინფლაციაში ფასების დონის ზრდა იგულისხმება, რომელიც ბოლო თვეების განმავლობაში რეკორდულად მაღალია. ეროვნული ბანკის პროგნოზით, ფასების ზრდის ამგვარი ტენდენცია მომდევნო თვეებშიც გაგრძელდება და მიზნობრივ მაჩვენებელს (3%) 2022 წელს ეტაპობრივად დაუბრუნდება.

"მოსალოდნელია, რომ ივნისში წლიური ინფლაციის მაჩვენებელი პიკს მიაღწევს, ხოლო 2021 წელს, სხვა თანაბარ პირობებში, საშუალოდ 7% იქნება. გამკაცრებული მონეტარული პოლიტიკის ხანგრძლივად შენარჩუნებითა და მონეტარული პოლიტიკისგან დამოუკიდებელი ერთჯერადი გარეგანი ფაქტორების მოსალოდნელი მილევის ფონზე, არსებული პროგნოზით, 2022 წელს ინფლაცია მიზნობრივ მაჩვენებელს ეტაპობრივად დაუახლოვდება", — ნათქვამია ეროვნული ბანკის განცხადებაში.

სებ-ის განცხადებაში მაღალი ინფლაციის გამომწვევი მიზეზების შესახებაც არის საუბარი და აღნიშნულია, რომ მიმდინარე პერიოდში ფასების ზრდა საწვავისა და სასოფლო-სამეურნეო ბაზრებზე პროდუქციის გაძვირებამ გამოიწვია. ეროვნული ბანკის აზრით, გასული თვეების ინფლაციზე გავლენა ეროვნული ვალუტის გაუფასურებამაც იქონია. ასევე, ეროვნული ბანკი მიიჩნევს, რომ თბილისში გაზის ტარიფის გაძვირება, ივნისის ინფლაციაზე გავლენას მოახდენს.

შეგახსენებთ, რომ მაისში წლიური ინფლაცია 7,7% იყო — ეს ბოლო 10 წელში ფასების ზრდის რეკორდული მაჩვენებელია. აპრილში ფასები წლიურად 7,2%-ით გაიზარდა. მაღალი ინფლაცია იყო მარტშიც, როდესაც ფასების ასევე 7,2%-იანი ზრდა დაფიქსირდა.

ინფლაციური რისკებიდან გამომდინარე, ეროვნულმა ბანკმა 23 ივნისს რეფინანსირების განაკვეთი ბოლო 13 წლის მაქსიმალურ მაჩვენებელზე, 9,5%-ზე დატოვა. რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს. როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ და ამ დროს მსესხებლებს აღნიშნულ განაკვეთზე მიბმული კრედიტები უძვირდებათ. შესაბამისად, ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს.

ცნობისთვის, ივნისის თვის ინფლაციის მაჩვენებელს სტატისტიკის ეროვნული სამსახური 2 ივლისს გამოაქვეყნებს.