მილიარდერმა მაკენზი სკოტმა საქველმოქმედო საქმიანობებისთვის კიდევ $2,7 მილიარდი გაიღო.

სკოტმა წერილიც გამოაქვეყნა, სადაც აღნიშნავს, რომ სურდა, ფული მათთვის გადაეცა, "ვინც წარსულში ფინანსურად დაჩაგრული და სხვებისგან შეუმჩნეველი იყო".

სოლიდური დონაციის მისაღებად, მილიარდერმა 286 ორგანიზაცია შეარჩია, რომლებიც რასობრივი უთანასწორობის, ხელოვნებისა და განათლების საკითხებზე მუშაობენ.

თუმცა, ეს პირველი შემთხვევა არაა, როცა სკოტი საქველმოქმედო საქმიანობისათვის ათნიშნა რიცხვით გამოსახულ თანხას ხარჯავს. გასული წლის დეკემბერში ცნობილი გახდა, რომ მხოლოდ ოთხ თვეში მან 4 მილიარდი გაიღო სხვადასხვა სახის სოციალური პროექტებისა და ორგანიზაციებისათვის.

გამოქვეყნებულ წერილში სკოტი ასევე აღნიშნავს, რომ იგი საქველმოქმედო საქმიანობას კვლავ აგრძელებს და მკვლევრების ჯგუფთან, მათ შორის, თავის ქმართან, მეცნიერების მასწავლებელ დენ ჯიუეტთან ერთად მუშაობს, რათა დონაციის მიმღები ახალი ორგანიზაციები იპოვოს. მილიარდერის თქმით, უმჯობესი იქნება, თუკი არაპროპორციულად განაწილებული თანხა მხოლოდ რამდენიმე ადამიანის ხელში არ იქნება და გადაწყვეტილებების მიღებაში სხვებიც იქნებიან ჩართულები.

სკოტი მსოფლიოში ერთ-ერთ უმდიდრეს ქალად მიიჩნევა. იგი 25 წელზე მეტი ხნის განმავლობაში ჯეფ ბეზოსზე, Amazon-ის მფლობელსა და ამ დროისათვის ყველაზე მდიდარ კაცზე იყო დაქორწინებული და მას ტექნოლოგიური გიგანტის შექმნაშიც ეხმარებოდა. 2019 წელს, წყვილის დაშორების შემდეგ, მაკენზიმ Amazon-ის 4-პროცენტიანი წილი მიიღო.

ამავე წელს სკოტმა ბილ და მელინდა გეიტსების შექმნილ დაბანდების ინიციატივას მოაწერა ხელი, რითიც აღთქმა დადო, რომ ქონების უმეტეს ნაწილს გაიღებდა. აღსანიშნავია, რომ ბეზოსი ამ ინიციატივის მონაწილე არაა.

მიუხედავად გაღებული დონაციებისა, მაკენზი სკოტი კვლავ მსოფლიოს 22-ე უმდიდრესი ქალია. Forbes-ის ცნობით, ფილანთროპის ქონება $59,5 მილიარდადაა შეფასებული.