დღეს, 16 ივნისს ჟენევაში აშშ-ს პრეზიდენტი ჯო ბაიდენი და რუსეთის პრეზიდენტი ვლადიმერ პუტინი ერთმანეთს შეხვდებიან. ორივე ლიდერის შეხვედრა, ქვეყნებს შორის კრიტიკული ურთიერთობის ფონზე გაიმართება.

ბაინდენისა და პუტინის ბოლო მოლაპარაკებები 2011 წელს იყო, როცა ბაიდენი ვიცე-პრეზიდენტი იყო, ხოლო პუტინი პრემიერმინისტრი.

სამიტი გრინვიჩის დროის 11 საათზე დაიწყება. მოსალოდენელია, რომ მხარეები ისაუბრებენ შეიარაღებაზე, კიბერთავდასახმაზე, უკრაინასა და ბელარუსზე. მოლაპარაკებები გაიმართება როგორც ვიწრო, ისე ფართო ფორმატში. ექსპერტები შეხვედრიდან რაიმე მნიშვნელოვან გარღვევას არ ელოდებიან.

აშშ-ს პრეზიდენტი რუსეთის ლიდერს თავისი პირველი საერთაშორისო ვიზიტის ფარგლებში ხვდება, რომელიც მან ევროპიდან დაიწყო. ამ ვიზიტის განმავლობაში მან დიდი შვიდეულისა და NATO-სამიტებში მიიღო მონაწილეობა.

პუტინის მრჩეველი საერთაშორისო საკითხებში, იური უშაკოვი ამბობს, რომ აშშ-სა და რუსეთს შორის ურთიერთობა "ჩიხში შევიდა" და ოპტიმიზმისთვის არც ისე ბევრი საფუძველია.

ამ ეტაპისთის ორივე ქვეყანას თავისი ელჩები გაწვეული ჰყავს, ხოლო რუსეთმა აშშ "არამეგობარი ქვეყნების" სიაში შეიყვანა. თუმცა პუტინის თქმით, არსებობს საკითხები, რაზეც შეუძლიათ თანამშრომლობა, მათ შორისაა სირიისა კონფლიქტი, ბირთვული შეიარაღება და კლიმატის ცვლილება.

ბაიდენის თქმით, ეს მნიშვნელოვანი ნაბიჯია, რათა ორმა ქვეყანამ ურთიერთობაში სტაბილურობა იპოვოს.