ქართული ოცნების დეპუტატი, არჩილ თალაკვაძე სამართლიანი არჩევნების წინასაარჩევნო შეფასებასთან დაკავშირებით აცხადებს, რომ "ელფერებით არ უნდა ვილაპარაკოთ" პალიტრანიუსის ეთერში მან აღნიშნა, რომ არ წერია არც კონსტიტუციაში, არც კანონში, რომ 3 თვის განმავლობაში პრემიერმინისტრი, პარლამენტის თავმჯდომარე, მერები უნდა გაჩერდნენ, გავიდნენ ცალკე ოთახში და მერე დაბრუნდნენ, როცა არჩევნები მორჩება.

"ჩემთვის მართლა მოულოდნელია ეს განწყობა და ასეთი ტიპის განცხადება. ვთქვათ, დავინტერესდით ამ შეფასებით, ამ კრიტიკის საპასუხოდ რას ელოდება სამართლიანი არჩევნები, რომ მთელი პოლიტიკური ისთებლიშმენტი, ყველა ვინც ქართული ოცნების გამარჯვების შემდეგ დღეს ვართ თანამდებობებზე, ვისაც გვევალება, რომ ყოველ დღე ვიმუშაოთ იმ საკითხებზე, რაც საზოგადოებასა და ქვეყანას სჭირდება, ახლა გავიდეთ ცალკე ოთახში, ჩავიკეტოთ და სანამ არჩევნები არ დამთავრდება, პროექტებს ჩვენ საერთოდ აღარ შევეხოთ? გავაჩეროთ ყველაფერი და არჩევნები რომ დამთავრდება, მერე განვაახლოთ ქვეყნის განვითარება?", — განაცხადა თალაკვაძემ.

მმართველი პარტიის წარმომადგენლის შეფასებით, სამართლებრივად ადმინისტრაციული რესურსის გამოყენება ვერ მოხდება თუ საარჩევნო კამპანია არ არის დაწყებული.

"საარჩევნო კამპანიის დაწყებას აქვს თავისი კანონიერი საფუძვლები და არჩევნების თარიღი და პერიოდიც არის კანონით განსაზღვრული. შესაბამისად, ახლა მითხარით, მაგალითად, ივნისში რატომ ითვლება საქმისა და პროექტების კეთება, რესურსის გამოყენებად და ვთქვათ თებერვალში რომ რაღაც საქმეებს აკეთებდა ხელისუფლება, ის რატომ არ ითვლება? იმიტომ, რომ თებერვალშიც არ იყო და დღესაც არ არის კამპანია დაწყებული... ელფერებით არ უნდა ვილაპარაკოთ, გრეის 50 ელფერი თუ იმის 100 ელფერი — კინოში არ ვართ, ვართ პოლიტიკაში და არის სამართლებრივი ჩარჩო ამ ქვეყანაში, რომელიც ამბობს, როდის იწყება კამპანია, როდის ტარდება არჩევნები და ასევე, ამბობს, რომ მთავრობამ უნდა იმუშაოს ყოველდღიურ რეჟიმში", — ამბობს ის.

15 ივნისს სამართლიანი არჩევნებისა და დემოკრატიის საერთაშორისო საზოგადოებამ (ISFED) 2021 წლის ადგილობრივი თვითმმართველობის არჩევნების წინა პერიოდის გარემოს შეფასების დოკუმენტი გამოაქვეყნა. ISFED-ის განცხადებით, მიუხედავად იმისა, რომ ქვეყანაში წინასაარჩევნო კამპანია ოფიციალურად ჯერ არ გამოცხადებულა, პოლიტიკურმა ძალებმა ამომრჩევლებთან შეხვედრები და აგიტაცია უკვე დაიწყეს. არასამთავრობო ორგანიზაცია აცხადებს, რომ ამ მხრივ, განსაკუთრებით მმართველი პარტია აქტიურობს, რომელსაც ადმინისტრაციულ რესურსზეც ხელი მიუწვდება.

სამართლიანი არჩევნების შეფასებით, ამგვარი პრაქტიკა კიდევ ერთხელ ადასტურებს, რომ საქართველოში საჯარო სამსახური ჯერ კიდევ შორსაა აპარტიულობის სტანდარტის დაცვისაგან.