თუ ნინოწმინდის პანსიონიდან ბავშვების გაყვანის პროცესი შეჩერდება, ომბუდსმენის წარმომადგენლები მონიტორინგისთვის ჩავლენ. ამის შესახებ ნინო ლომჯარიამ დღეს ჟურნალისტებთან საუბრისას განაცხადა.

მისი თქმით, ბოლო პერიოდში ომბუდსმენის აპარატი ნინოწმინდის ბავშვთა სახლში მონიტორინგისგან თავს იკავებდა, რათა ბავშვებისთვის დამატებითი სტრესული გარემო არ შეექმნათ.

"თუ უახლოეს დღეებში დავინახეთ, ბავშვების პანსიონიდან გამოყვანისა და მათი ოჯახებში ინტეგრაციის პროცესი გაჩერდა და არ განხორციელდა ისე აქტიურად, როგორც ბოლო პერიოდში ხორციელდებოდა, მივიღებთ გადაწყვეტილებას, რომ განვახორციელოთ მონიტორინგი", — განაცხადა მან.

ამასთან, ლომჯარია აღნიშნავს, რომ ბოლო პერიოდში განვითარებული მოვლენებიდან გამომდინარე, მოლოდინი აქვს, პანსიონში მონიტორინგისთვის შეუშვებენ.

"მე მაქვს მოლოდინი, რომ ჩვენ შევძლებთ მონიტორინგის განხორციელებას. ბოლო პერიოდში განვითარებული მოვლენები ოპტიმიზმის საფუძველს მაძლევს. პირველ რიგში ის, რომ დაიწყო უპრეცედენტო პროცესი ბავშვთა უფლებრივი დაცვის მიმართულებით, რაზეც წლებია, ვსაუბრობთ და სახელმწიფოს არანაირი რეაგირება და ნაბიჯები არ ჰქონია. დაიწყო დეინსტიტუციონალიზაციის პროცესი, მათ შორის, რელიგიური კონფესიების დაქვემდებარებაში მყოფი პანსიონების მიმართ და დარწმუნებული ვარ, რომ ჩვენ საშუალება გვექნება, იქ შევიდეთ და მონიტორინგი განვახორციელოთ", — ამბობს სახალხო დამცველი.

ნინოწმინდის ბავშვთა პანსიონს, სპირიდონის ნაცვლად, ბოდბელი ეპისკოპოსი, მეუფე იაკობი (იაკობიშვილი) უხელმძღვანელებს. ნინოწმინდის ბავშვთა პანსიონიდან ბავშვების გამოყვანის პროცესი 6 ივნისიდან, მას შემდეგ დაიწყო, რაც თბილისის საქალაქო სასამართლომ PHR-ის სარჩელი დააკმაყოფილა. პანსიონში ამ დრომდე 23 ბავშვი რჩება, რომლებიც სოციალური მუშაკების მეთვალყურეობის ქვეშ არიან.