ის აპლიკანტები, რომლებსაც გამოცდების პერიოდში კორონავირუსი დაუდასტურდება, გამოცდებს 2 კვირის შემდეგ დაწერს. ამის შესახებ განათლების სამინისტრო ავრცელებს ინფორმაციას.

ერთიანი ეროვნული გამოცდები პირველ ივლისს იწყება. როგორც მინისტრის მოადგილე ნუნუ მიცკევიჩი აცხადებს, გამოცდაზე მოსულ თითოეულ აპლიკანტს უსაფრთხო და კომფორტული გარემო დახვდებათ.

2021-ის მთავარი სიახლე იქნება ის, რომ საგამოცდო პროცესს არ გამოეთიშებიან ის აპლიკანტები, რომლებსაც გამოცდების მიმდინარეობისას ვირუსი დაუდასტურდებათ – პირებს, რომლებსაც საგამოცდო პერიოდში გამოუვლინდებათ COVID-19, შეფასებისა და გამოცდების ეროვნული ცენტრი საგანგებოდ შედგენილი ცხრილის მიხედვით გამოცდას შესაბამის საგანში ჩაუტარებს არაუადრეს 2 კვირისა. გათვალისწინებული იქნება გეოგრაფიული დაფარვაც.

გამოცდების ეროვნული ცენტრის ხელმძღვანელი, სოფო გორგოძე აღნიშნავს, რომ გამოსაცდელებმა უნდა დაიცვან დისტანცია, მათ უნდა ეკეთოთ პირბადე როგორც რეგისტრაციისაც, ისე გამოცდის მიმდინარეობისას და დაიმუშავონ ხელები ადგილზე განთავსებული სადეზინფექციო ხსნარით.

სოფო გორგოძის თქმით, ცენტრი წელსაც მოაწყობს საკარანტინე სივრცეებს იმ გამოსაცდელებისათვის, რომელთაც აღენიშნებათ ტემპერატურა 37°С და მეტი, მაგრამ არ აქვთ დადასტურებული COVID-19.

გამოსაცდელთა და მეთვალყურეთა დაშვება მოხდება მხოლოდ ყოველი საგამოცდო სექტორის ფართობის 50%-ზე. თითოეული სამუშაო მაგიდა წინა მხრიდან აღჭურვილი იქნება გამჭვირვალე დამცავი ფარით/ბარიერით; მაგიდებს შორის დაშორება იქნება მინიმუმ 2 მეტრი, ერთმანეთის მიმდევრობით განლაგებულ მაგიდებს შორის მანძილი კი — 1 მეტრი. კონდიციონერები ირთვება 30° გრადუსზე მაღალი ტემპერატურის პირობებში.