ქართული ოცნება ზუგდიდში შუალედური არჩევნების შედეგების გაუქმებას ითხოვს. ტელეკომპანია რუსთავი 2-ის ინფორმაციით, საოლქო საარჩევნო ადმინისტრაციაში სარჩელი უკვე შეიტანეს.

დოკუმენტის თანახმად, ქართული ოცნება ზუგდიდის საარჩევნო ოლქის 53-ე და 54-ე უბნების ბიულეტენების ხელახალ გადათვლას, კენჭისყრის შედეგების გადასინჯვას ითხოვს. ასევე, ითხოვენ რომ გაბათილდეს 67-ე საარჩევნო ოლქის შედეგები.

"დღის განმავლობაში კენჭისყრა უბნის შიგნით დაძაბულ, სტრესულ გარემოებაში მიმდინარეობდა, რაც გამოწვეული იყო უბნის გარეთ დაპირისპირებული ჯგუფების დიდი რაოდენობით მობილიზებით, რაც შემდგომში ხელჩართულ ჩხუბშიც კი გადაიზარდა. იმის გამო, რომ საუბნო საარჩევნო კომისიის წევრები იმყოფებოდნენ უბნის შიგნით მყოფი წარმომადგენლებისა და დამკვირვებლების გავლენის ქვეშ ხმის დათვლის პროცესი წარიმართა ხარვეზებით",- ნათქვამია რუსთავი 2-ის მიერ გავრცელებულ ქართული ოცნების საჩივრის წერილში.

ცენტრალური საარჩევნო კომისიის წინასწარი შედეგებით, ზუგდიდის რაიონის სოფელ კორცხელში, სადაც ნაციონალური მოძრაობის მხარდამჭერები და ლიდერები სცემეს, ადგილობრივი თვითმმართველობის არჩევნები ენმ-ს კანდიდატმა ვარადებულ ლაშხიამ მოიგო. მან ხმების 49.76% მოაგროვა, სულ - 623 ხმა. ქართული ოცნების კანდიდატმა ამირან ლაგვილავამ კონკურენტზე 10 ხმით ნაკლები, 613 ხმა მიიღო.