ქართული ოცნების თავმჯდომარის, ირაკლი კობახიძის განცხადებით, ნაციონალური მოძრაობის თავმჯდომარეს, ნიკა მელიას ვერ უშველა "ვერც შინაურმა და გარეულმა გვარამიამ და გახარიამ". ამის შესახებ მან პარლამენტში სიტყვით გამოსვლისას ისაუბრა.

"შეგახსენებთ, ეს არის ადამიანი, რომელსაც არა აქვს არავითარი ნიშანწყალი კაცობის და სწორედ ამას უკავშრდება, მათ შორის, ის დანაშაულები, რომელიც მისი მხრიდან არის ჩადენილი და ის პოლიტიკური რიტორიკა, რომელსაც ჩვენ დღეს ვისმენდით. ეს არის ადამიანი, რომელიც ცოტა ხსნის წინ იყო ჩასული თავისი პარტიის რეალურ ლიდერთან და დასჯილი სკოლის მოსწავლესავით უსმენდა, რა უნდა გაეკეთებინათ მომავალში.

ეს არის, რა თქმა უნდა, აბსოლუტურად მიუღებელი და ასეთი პოლიტიკოსების და პარტიების მომავალი ქართულ დემოკრატიული სისტემაში, არ არის და ვერ იქნება და ამას საზოგადოება გასცემს სათანადო პასუხს. არ გადავიხდი, ვერ დამიჭერთ. ყველას გახსოვთ ნიკანორ მელიას ეს ცნობილი ფრაზა და ყველას ისიც ძალიან კარგად გახსოვთ, რომ არ გადაიხადა და დაიჭირეს. ვერ უშველეს ვერც შინაურმა და ვერც გარეულმა, ხატოვნად რომ ვთქვათ, ვერც გვარამიამ და ვერც გახარიამ, ვერც ერთმა და ვერც მეორემ", — თქვა მან.

ნაციონალური მოძრაობა პარლამენტში მივიდა. პარტიის წევრებმა 8 ივნისს პარლამენტში მისვლა დააანონსეს, თუმცა მე-10 მოწვევის პარლამენტის საგაზაფხულო სესიის პლენარულ სხდომაზე არ გამოცხადებულან. ისინი საკანონმდებლო ორგანოში სხდომის შესვენების დროს მივიდნენ. ნაციონალური მოძრაობის წევრების პარლამენტში არყოფნის გამო, ამნისტიის კანონპროექტის მოსმენა გადაიდო.

ამასთან, 7 ივნისს პარლამენტში ერთიანი ნაციონალური მოძრაობა — გაერთიანებული ოპოზიცია ძალა ერთობაშიას ფრაქცია შეიქმნა, როლმელსაც ხატია დეკანოიძე უხელმძღვანელებს. ფრაქცია 32 წევრისგან შედგება.

30 მაისს პარტიამ საკანონმდებლო ორგანოში შესვლის გადაწყვეტილება მიიღო. მიუხედავად ამისა, ენმ შარლ მიშელის დოკუმენტს ხელს არ მოაწერს. გადაწყვეტილება პოლიტსაბჭოს შემდეგ გახდა ცნობილი. იმავე დღეს საქართველოში ევროკავშირისა და ამერიკის შეერთებული შტატების საელჩოებმა განცხადება გაავრცელეს, სადაც აღნიშნეს, რომ ნაციონალური მოძრაობის პარლამენტში შესვლის გადაწყვეტილებას მიესალმებიან, მაგრამ წუხან ევროპული საბჭოს პრეზიდენტის, შარლ მიშელის დოკუმენტზე ხელის არმოწერის გამო.