საკუთარ თავზე ზრუნვა მენტალური ჯანმრთელობისთვის უმნიშვნელოვანესია: ყოველთვის უნდა დავაფასოთ საკუთარი თავი, ჩვენი შესაძლებლობები, გავითვალისწინოთ ჩვენთვის საჭირო გარემოებები და ყური დავუგდოთ გულის ხმას.

ამის მისაღწევად საზოგადოებაში საკმაოდ გავრცელებულია რამდენიმე საყოველთაოდ აღიარებული რჩევა, რომლებიც როგორც ინტერნეტსივრცეში, ისე ყოველდღიურობაში ახლობელი ადამიანებისგანაც კი შეიძლება მოვისმინოთ. ერთი შეხედვით, მსგავსი მოსაზრებები ჩვენს უკეთ ყოფნას ემსახურება, თუმცა პრაქტიკაში ბევრ ასეთ მიღებულ "ჭეშმარიტებას" ხშირად ზიანის მოტანაც შეუძლია.

ამის საილუსტრაციოდ რამდენიმე მოსაზრებას წარმოგიდგენთ, რომლებიც Reddit-ის მომხმარებლებმა განიხილეს:

1. "მხოლოდ დადებითზე იფიქრე"

"ხშირად ადამიანები ამას მაშინ ამბობენ, როცა ვიღაც თავის მწუხარებას, იმედგაცრუებას, ემოციურ გადაღლას ან სიბრაზეს — ყველაფერს, გარდა ბედნიერებისა — გამოხატავს. დადებით განწყობას მართლა შეუძლია კარგი გავლენის მოხდენა, მაგრამ ეს სულაც არ ნიშნავს იმას, რომ სხვა ემოციები არ უნდა გაგიჩნდეს და ბუნებრივად არ უნდა მიიღო ასეთი მდგომარეობა".

2. "თუ ვინმეს ჩემი ყველაზე ცუდი მდგომარეობის ატანა არ შეუძლია, მაშინ არც ჩემს საუკეთესო განწყობას იმსახურებს"

"სასაცილოა, რომ ვინც ამას ამბობს, ყოველთვის თავის "ყველაზე ცუდ" განწყობაზეა ხოლმე".

3. "მკიდია, ხალხი რას იფიქრებს"

"კი, ხშირად ასე უნდა იყოს, მაგრამ არა ყოველთვის: შეგიძლია, დაიკიდო, თუ რას იფიქრებენ სხვები შენს მუსიკალურ გემოვნებაზე, მაგრამ არა ის, თუ როგორ იმოქმედებს შენი გადაწყვეტილებები სხვებზე. სამწუხაროდ, ამ ფრაზით ბევრი სწორედ ამას გულისხმობს: "არ მადარდებს, თუ ვინმეს რამე ზიანს მივაყენებ". მნიშვნელოვანია, ყოველთვის გაითვალისწინო ის შედეგები, რაც შენს ქმედებებს მოჰყვება".

4. "ის გააკეთე, რაც შენ გგონია სწორი"

წარმოიდგინეთ, ამით რომ იხელმძღვანელოს ყველა სერიულმა მკვლელმა ან ნებისმიერმა ბოროტმოქმედმა.

5. "გაანებივრე საკუთარი თავი"

"ხანდახან ეს მართლა საჭიროა, მაგრამ ზოგჯერ შეიძლება ცუდი ფინანსური რჩევა იყოს: თუ იცი, რომ რაღაცას ვერ გასწვდები, არც უნდა გააკეთო".

6. "ნუ იქნები სევდიანი. უამრავი მიზეზი გაქვს, რომ ბედნიერი იყო"

"თუნდაც ცოტა მიზეზი გქონდეთ ბედნიერებისთვის, არ უნდა გრცხვენოდეთ, თუ სევდა შემოგაწვებათ რაღაცის გამო".

7. "კაცურად მოიქეცი, ძლიერი იყავი"

"ამის მთქმელები ხშირად იმას გულისხმობენ, რომ კაცს ტირილის ან ემოციების გამოხატვის უფლება არ აქვს".

8. "დანაშაულის გრძნობა არაფრის მომტანია"

"ჩემმა ექიმმა ამასთან დაკავშირებით შემდეგი რამ მითხრა: "ეს გრძნობა რამეში გეხმარება? მაშინ დანაშაულის გრძნობა სასარგებლო ყოფილა. რამე გასწავლა? ცუდი ქცევის შეცვლაში დაგეხმარა? მომავალში სავარაუდო შეცდომის დაშვებას აგარიდებს? მაშინ ნამდვილად სასარგებლოა. თუ დანაშაულის გრძნობა გაწუხებს, რომელიც კარგად გაანალიზე, მაგრამ ეს არაფერში გამოგადგა, მაშინ მართლაც არაფრის მომტანი ყოფილა და სინდისმაც აღარ უნდა შეგაწუხოს".

9. "იყავი ის, ვინც ხარ"

"როგორც წესი, ამაში იგულისხმება: 1) ნუ შეგრცხვება შენი უნიკალურობის; 2) მიჰყევი შენს ოცნებებს; 3) გადადგი მორალურად უფრო გამართლებული ნაბიჯი, თუნდაც სხვები ასე არ იქცეოდნენ. თუმცა ამას ბევრი არასწორად იგებს და ფიქრობენ, რომ თუ ვინმეს საშინლად მოექცევიან, არაუშავს. სიმართლე კი ისაა, რომ ხანდახან სულაც არ არის სწორი, რომ "ის იყო, ვინც ხარ". ხანდახან უბრალოდ უნდა ეცადო, რომ შეიცვალო და შენი ცუდი ქმედებებით სხვას აღარ ავნო".

10. "შორს მისგან, ვინც არ გეთანხმება"

"ცხადია, ეს მეთოდი გამოდგება იმ ადამიანებთან, რომლებიც თავს საშინლად გაგრძნობინებენ, მაგრამ ყველა გარშემომყოფი, ვინც კი კვერს არ დაგიკრავს ან შენგან განსხვავებულად ფიქრობს, არ ნიშნავს, რომ მათგან თავი ყოველთვის შორს უნდა დაიჭირო".

Responsible.ge ევროპაბეთის პლატფორმაა, რომელიც საზოგადოებაში აზარტული თამაშების შესახებ ცნობიერების ამაღლებასა და პასუხისმგებლიანი თამაშის პოპულარიზაციას ემსახურება. ამასთანავე, პლატფორმის დახმარებით, შეგიძლიათ, გაეცნოთ პასუხისმგებლიანი თამაშის ხელსაწყოებსა და ანგარიშებს, ასევე ინფორმაციას ევროპაბეთის პასუხისმგებლობის შესახებ საზოგადოების მიმართ, ბიზნესსა და კომუნიკაციაში.