ვახტანგ მეგრელიშვილის განცხადებით, იდენტობის პოლიტიკა არის ადამიანების სხვდასხვა ჯგუფად დაყოფა, რათა სახელმწიფომ შემდგომ მათი უფლებები "გამოიგონოს" და შექმნას ბიუროკრატია. ამის შესახებ მან პარლამენტში სიტყვით გამოსვლის დროს, ნინოწმინდის პანსიონზე საუბრისას განაცხადა. მისი თქმით, დღეს ყველა დამნაშავეს ეძებს და ყველას ექნება თავისი წილი ბრალიცა და დამსახურებაც, რომელიც იგნორირებულია. თუმცა, მეგრელიშვილი აცხადებს, რომ დისკუსია ბევრად უფრო ღრმაა.

"პრობლემა იწყება მაშინ, როდესაც ჩვენ ადამიანებს ვუყურებთ ჯგუფებად — ბავშვებად, ქალებად, კვოტის თემაც ხომ იგივეა, რომ ჩვენ ადამიანებს ვუყურებთ სხვადასხვა ჯგუფის წარმომადგენლებად და აქედან ვიქმნით წარმოდგენას მათზე. ამ პრობლემას, ჩვენს პარლამენტში შეიძლება არ გაჟღერებულა, მაგრამ იდენტობის პოლიტიკა ჰქვია და ძალიან დიდი პრობლემაა დასავლეთის სამყაროსთვის. იდენტობის პოლიტიკა ნიშნავს ადამიანების დაჯგუფებას ქალებად, ლგბტ თემის წარმომადგენლებად, ბავშვებად, რელიგიურ და ეთნიკურ ჯგუფებად, ღარიბებად და შეძლებულებად. რისთვის? იმისთვის, რომ მერე სახელმწიფომ მათი უფლებები გამოიგონოს და შექმნას ბიუროკრატია, რომელიც ამ ჯგუფებს მათი უფლებების შესაბამისი საჩუქრების დარიგებაში დაეხმარება, თითქის სოციალური მდგომარეობა, ანუ მარტივად რომ გითხრათ — გაჭირვება, იყოს რაიმე უფლების წარმოშობის პირობა", — განაცხადა გირჩის ერთ-ერთმა ლიდერმა.

მეგრელიშვილმა გააკრიტიკა ბავშვის უფლებათა კოდექსი და თქვა, რომ ის ერთპარტიული იყო. კრიტიკის მიზეზად მან, მათ შორის, ერთი ჩანაწერი დაასახელა:

"აკრძალულია ბავშვის მშობლის ან კანონიერი წარმომადგენლის გარეშე ყოფნა ინტერნეტ სალონში ან კაფეში ღამის 22:00 საათის შემდეგ. ანუ იაგო და სანდრო ჩემს შვილებს ვერ წაიყვანენ ვერც ინტერნეტსალონში, ვერც კინოში და ამისთვის 1000 ლარით გამოუწერენ ჯარიმას", — თქვა მან.

გირჩის ერთ-ერთმა ლიდერმა თქვა ისიც, რომ ბევრ ადამიანს ბავშვის აყვანა სურს და სახელმწოფო მათსა და იმ ადამიანებს შორის დგას, ვინც შვილებს ვერ უვლის.