კულტურის, სპორტისა და ახალგაზრდობის მინისტრის, თეა წულუკიანის თქმით, ყოფილი პრემიერის, გიორგი გახარიას გუნდის წევრები ავრცელებდნენ ხმას, რომ ქართული ოცნების მიერ მხარდაჭერილები არიან.

"არაერთი მათგანის ქმედებების შესახებ არის ინფორმაცია, ეს ბევრმა თქვენგანმა ალბათ იცის, ისინი თავად ავრცელებდნენ ხმას სხვადასხვა პარტიულ აქტივში, ზოგიერთ რეგიონში, რომ ისინი იყვნენ მხარდაჭერილნი ქართული ოცნების და პირადად ბიძინა ივანიშვილის მიერ. ჩვენ ვიცოდით, რომ ეს იყო სიცრუე, მაგრამ, როგორც ჩანს, ამგვარმა ქმედებამ მიიყვანა ბიძინა ივანიშვილი იქამდე, რომ ეს პოლიტიკიდან წასული კაცი გამოდის და იძახის, რომ მისი სახელის გამოყენება არის დაუშვებელი", — აღნიშნავს წულუკიანი და ამატებს, რომ ივანიშვილი სახელის გამოყენება გუნდისთვისაც მიუღებელია.

დღეს, 7 ივნისს, ქართული ოცნების ყოფილმა თავმჯდომარემ, ბიძინა ივანიშვილმა განცხადება გაავრცელა და ყოფილი თანაგუნდელი, გიორგი გახარია გააკრიტიკა. ის ამბობს, რომ იმედგაცრუებულია და ექსპრემიერს გუნდისა და ქვეყნის მოღალატეს უწოდებს, მის საქციელს კი პოლიტიკურ დანაშაულად აფასებს.